Almatyda kúzgi aǵash egý naýqany júrip jatyr

<p>Almatylyq kógaldandyrýshylar jasyl jelekterdi otyrǵyzý jumystaryn júrgizip jatyr, dep habarlaıdy <a href="Kazinform" target="_blank" rel="noopener">Kazinform</a>.</p>

Almaty ákimdiginiń málimetinshe, búgingi kúnge 23 459 aǵash otyrǵyzyldy. Atap aıtqanda, Medeý aýdanynda – 2000, Jetisý aýdanynda - 3070, Túrksib aýdanynda - 3900, Almaly aýdanynda - 7000, Áýezov aýdanynda - 2489, Bostandyq aýdanynda - 3500, Alataý aýdanynda – 1500 aǵash egildi. Naýryzbaı aýdanynda 30 qazan kúni 10 myń túp aǵashty otyrǵyzý bastalady, qazirgi ýaqytta ol úshin oryndar daıyndalyp jatyr.

«Bıyl Almaty qalasynyń jasyl qory 320 myń jasyl jelekpen tolyǵady, onyń 22 myńy kóktemde otyrǵyzyldy, 298 myńy kúzge josparlandy. Bas botanıkalyq baq pen ǵylymı agrarlyq ýnıversıtettiń mamandarynyń usynysymen kóshelerdiń boıyna jalpaq japyraqty shegirshin, emen, úıeńki, shaǵan, terek, al saıabaqtar men skverlerge - sánaǵash, qaıyń, akatsııa, shyrsha jáne jemis (alma, shıe, almurt, órik) aǵashtary otyrǵyzylyp jatyr. Aǵashtyń bul túrleri tyǵyz ósip, saıaly kóleńkege aınalyp, las aýanyń aǵynyn jaqsy ustaıdy», - dep habarlady ákimdiktiń baspasóz qyzmeti.

Sondaı-aq ákimdiktiń málimetinshe, kóshetterdi jaqsylap sýarý úshin egý oryndarynda avtomatty sýarý júıeleri ornatylǵan. 2023 jyly qabyldanǵan Jasyl jelekterdi kútip-baptaý jáne qorǵaý erejesi boıynsha egilgen aǵashtarǵa 3 jylǵa deıin kútim jasaý jetkizýshilerge júktelgen. Jasyl jelekterdi tıimdi sýarý jáne kóshetterdiń tamyrlanyp ósýi úshin bıyl sý jınaǵyshtyń qurylysy men rekonstrýktsııalaý jumystary bastaldy.