Almatyda Qurmanǵazy kóshesi eki aıǵa jabylady
«Almaty jylý jelileri» mekemesinen málim etkendeı, 17 maýsym men 17 tamyz aralyǵynda Medeý aýdanyndaǵy Qurmanǵazy kóshesi boıymen Pýshkın kóshesinen Dostyq dańǵylyna deıin jáne Dostyq dańǵylynan Zenkov kóshesine deıin avtokólik qozǵalysy jabylady.
Dostyq dańǵylynan Zenkov kóshesine deıingi qozǵalys eki jaqqa da shekteledi.
«1986 jyldan beri paıdalanylyp kele jatqan atalǵan kósheniń júris bóliginiń astynan ótetin jalpy uzyndyǵy 305 metr qubyrdy qaıta jańartý ýchaskesinde josparly jumystardy júrgizý qaýipsizdigin qamtamasyz etý úshin ýaqytsha shekteýler engiziledi. Sońǵy 5 jylda bul ýchaskede 10-ǵa jýyq aqaý joıyldy», — dep habarlady «Almaty jylý jelileri» JShS.
Bul qubyr ýchaskesi jylýmen jáne ystyq sýmen 5 kóppáterli turǵyn úıdi jáne 4 ózge de obektilerdi qamtamasyz etedi.
Atalǵan tutynýshylarǵa rekonstrýktsııa júrgizý kezeńinde ystyq sý beriletin bolady.