Almatyda qurylys nysandaryn baqylaý kúsheıtiledi

<p>ALMATY. KAZINFORM &mdash; Almaty máslıhatynyń XXVI kezekten tys sessııasynda qurylys-montaj jumystarynyń kótergish jáne (nemese) qorshaý qurylymdaryn salý men qaıta qurýǵa qoıylatyn talaptarǵa sáıkestigin tekserý maqsatynda qurylys nysandaryna kirý tártibi bekitildi.</p>

Atalǵan quqyqtyq akt jobasyn Almaty qalasynyń Qalalyq qurylys baqylaý basqarmasy Almaty ákimi Erbolat Dosaevtyń tapsyrmasymen ázirledi.

Qazir sáýlet-qurylys baqylaý organdarynyń qurylys nysandaryna kedergisiz kirý múmkindigi joq ekeni belgili. QR Kásipkerlik kodeksine sáıkes resmı ótinishterdiń negizinde ǵana tekserýge bolady.

Qurylys nysandaryna kirýdiń bekitilgen tártibi boıynsha ınspektsııa júrgizýge negiz retinde ruqsat qujattary joq qurylys-montaj jumystarynyń júrgizilýi, bekitilgen jobalyq-smetalyq qujattamadan aýytqý jáne qurylys-montaj jumystarynyń bastalǵany týraly habarlamanyń bolmaýy sekildi faktiler qyzmet ete alady. Osylaısha, bul tártip bastapqy kezeńinde zańsyz qurylystyń jolyn kesýge múmkindik beredi.

Bul rette, tekserý júrgizý úshin nysanda tıisti túrde habarlanǵan múddeli tulǵanyń bolmaýy ınspektsııa júrgizýge kedergi jasaı almaıdy. Bul jospardan tys tekserý júrgizý talaptarynan erekshelenedi.

Sáýlet-qurylys baqylaý jáne qadaǵalaý organdary Qazaqstan Respýblıkasynyń Kásipkerlik kodeksine sáıkes jospardan tys tekserýler júrgizýdi jalǵastyrady. Alaıda ınspektsııa aıasynda anyqtalǵan buzýshylyqtar bolǵan jaǵdaıda jańa tártip buzýshylyqtardy joıý úshin aýdan ákimdiginiń haty negizinde jedel tekserý júrgizýge múmkindik beredi.

Aıta keteıik, qazirgi ýaqytta bul quqyqtyq akt Ádilet departamentinde tirkeldi.

Osyǵan deıin, Almatyda 12 qabattan joǵary qurylysqa tyıym salynýy múmkin ekeni týraly jazǵan edik.