Almatyda kóshe shamdary jańasyna aýystyrylyp jatyr
Almaty ákimdiginen málim etkendeı, eski synap jáne natrıı shamdary jańa jaryqdıodty LED- ke aýystyrylyp jatyr. Osy jyldyń 10 aıynda qalada bes myńnan astam jaryqtandyrý qurylǵysy jańartyldy.
«Shamdardy aýystyrý búkil kóshe men shaǵyn aýdandardy qamtydy. Mysaly, Naýryzbaı aýdanynda Abaı men Alataý dańǵyldarynyń qıylysynda eskileriniń ornyna 335 jańa sham ornatyldy.Túrksib aýdanyndaǵy Súıinbaı dańǵylynda Bekmahanov kóshesinen Krasnogorskaıa kóshesine deıin 260 sham aýystyryldy. Jetisý aýdanyndaǵy Kókjıek shaǵyn aýdanynyń kóshelerinde 120 sham aýystyryldy, al Alataý aýdanynyń Zerdeli shaǵyna aýdanynda sonsha sham jańardy»,- dep atap ótti ákimdikten.
«Almaty Qala Jaryq» mamandarynyń sózinshe, sapaly LED-sham 50 myń saǵatqa deıin úzdiksiz jumys isteı alady – bul eski úlgidegi qurylǵylarǵa qaraǵanda 30 ese uzaq. Bul jaǵdaıda energııany únemdeý 90% deıin jetýi múmkin.
«Sonymen qatar, jaryqdıodty shamdar kádege jaratýda qıyndyqtar týǵyzbaıdy, óıtkeni quramynda synap pen natrıı joq. Eski shamdardy jańasyna aýystyrý jumystary 2025 jyly da jalǵasady. Olar aýdandyq ákimdiktermen birlesip ótkiziledi, olardyń balansynda qalanyń syrtqy jaryqtandyrý jelileri bar»,- delingen habarlamada.