Almatyda kólik qaýipsizdigi týraly kýálikti qashyqtan berip kelgen zerthana jumysy toqtatyldy

<p>ALMATY. KAZINFORM &mdash; Almatyda kólik quraly konstrýktsııasynyń qaýipsizdigi týraly kýálikterdi (KQKQK) berý tártibiniń buzylýyna baılanysty synaq zerthanasynyń qyzmeti toqtatyldy. Mundaı sheshimdi Almaty qalasynyń ákimshilik quqyq buzýshylyq jónindegi mamandandyrylǵan aýdanaralyq soty qabyldady.</p>

QR SIM Tehnıkalyq retteý jáne metrologııa komıtetiniń Almaty qalasy boıynsha departamenti júrgizgen jospardan tys tekserý kezinde kólik quraly konstrýktsııasynyń qaýipsizdigi týraly 156 kýálik qajetti synaqtarsyz berilgeni anyqtaldy.

Almatyda ornalasqan synaq ortalyqtary Aqtaýda ýaqytsha saqtalatyn avtomobılderge qujattardy rásimdegen. Bul Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentiniń (KO TR018/2011) talaptaryn óreskel buzý bolyp tabylady.

KO TR018/2011 talaptaryna sáıkes akkredıttelgen synaq zerthanalary nómiri boıynsha sáıkestendirýge, konstrýktsııanyń tehnıkalyq saraptamasyn qosa alǵanda, kólik quraldaryna tekseris júrgizýge, sondaı-aq qajetti synaqtar men ólshemderdi oryndaýǵa mindetti. Osy protsedýralardyń negizinde hattama jasalady, ol KQKQK berý úshin negiz bolady.

«Anyqtalǵan buzýshylyqtarǵa baılanysty zerthanaǵa qatysty „Sáıkestikti baǵalaý salasyndaǵy akkredıtteý týraly“ Qazaqstan Respýblıkasynyń Zańyn jáne „Tehnıkalyq retteý týraly“ Qazaqstan Respýblıkasynyń Zańyn saqtamaǵany úshin ákimshilik is qozǵaldy. Tekserý qorytyndysy boıynsha zańnamany buzý týraly hattama jasaldy», — dep jazdy vedomstvodan.

Almaty qalasynyń ákimshilik quqyq buzýshylyq jónindegi mamandandyrylǵan aýdanaralyq sotynyń qaýlysymen zerthanaǵa 719940 teńge kóleminde aıyppul salyndy. Sondaı-aq zerthanany akkredıtteý attestaty 6 aı merzimge toqtatyldy. Sottyń sheshimine qaıta shaǵym túsikenimen, Almaty qalalyq soty qaýlyny kúshinde qaldyrdy.