Almatyda qolaısyz aýa raıynan ne búlindi
Ákimdiktiń málimetinshe, qalada qatty jel men jańbyrdyń saldarynan 26 aǵash qulaǵan. 29 naýryzdyń tańǵy ýaqytyna deıin barlyq ýchaske tazartylyp, qulaǵan aǵashtar kesilip, syrtqa shyǵaryldy.
Túngi ýaqytta sýdyń aryqtarmen kedergisiz aǵyp ketýi qamtamasyz etildi. Barlyq aryq ótkelderi tazartyldy, sý basatyn oryndarǵa 344 birlik arnaıy tehnıka men 163 jumysshy jumyldyryldy. Qaýipti ýchaskelerde sý basýdyń aldyn alý maqsatynda 953 qap ınertti materıal paıdalanyldy.
Sondaı-aq, aýa raıynyń qolaısyzdyǵyna baılanysty túngi ýaqytta «AJK» jelileri 25 ret ajyratyldy, elektrmen jabdyqtaý tolyǵymen qalpyna keltirildi. Aǵashtyń qulaýyna baılanysty «QazTransGazAımaq» AQ jelisinde 2 ret jaryq sóndi. Qazir qalpyna keltirý jumystary júrip jatyr.
28 naýryzdaǵy aýa-raıynyń kúrt nasharlaýy men jyldamdyǵy 18-24 m/s deıin soqqan qatty jelden «Aqsaı-4» shaǵyn aýdanynda № 132 mekteptiń shatyrynyń bólshegi ushyp ketti. Mektep 1988 jyly salynǵan, sońǵy kúrdeli jóndeý jumysy 2007 jyly júrgizilgen. Merdiger uıymdardyń kúshimen kanıkýl aıaqtalǵanǵa deıin mektep shatyry jóndelmek.
Bostandyq aýdanynda Qurylys jáne menedjment kolledjiniń shatyryna zaqym keldi. Ony ǵımarat ıeleri qalpyna keltiretin bolady.
Sıgnaldy jedel óńdeý maqsatynda qalalyq TJD-da jedel jeli ashylyp, «112» operatorlarynyń sany artty. Tirshilikti qamtamasyz etý nysandary shtattyq rejımde jumys istep tur, zardap shekkender joq. Aýdan ákimdikterinde jumysty baqylaý boıynsha táýlik boıy kezekshilik uıymdastyryldy.
«Kólikke aǵash qulaǵan jaǵdaıda, aǵashtyń qulaý faktisin tirkeý jáne oqıǵanyń syzbasyn jasaý úshin jol patrýldik polıtsııasyn shaqyrý qajet. Keltirilgen zalaldy óteý úshin zalaldyń qunyn baǵalaý júrgizý kerek. Sonymen qatar, keltirilgen zalaldy óteýge jaýapty adamdy anyqtaý úshin memlekettik organdarǵa ótinish jazý arqyly sotqa deıingi narazylyq jumystaryn júrgizý, qajet bolsa zalal somasyn óndirip alý týraly talap aryzben sotqa júginý kerek», — dep habarlady Almaty ákimdigi.
Aıta keteıik, Qazgıdromettiń boljamynsha 29 naýryzda 2 mm-ge deıin, 30 naýryzda 8 mm-ge deıin jańbyr jaýady dep kútiledi.
Eske salaıyq, Almatyda keshe jel kúsheıip, shańdy daýyl turdy. Daýyldyń arty jańbyrǵa ulasty. https://kaz.inform.kz/news/almati-auezhayinda-reyster-keshgp-zhatir-5cb9cb
Almatylyq qutqarýshylar men kommýnaldyq qyzmetter kúsheıtilgen qyzmetke kóshkenin habarlaǵanbyz.