Almatyda qoqys shyǵarýdyń jańa tarıfi bekitildi
Esepteýlerge sáıkes jyldyq tarıf 1tekshe metr qaldyq úshin 3 309 teńge, aılyq tarıf bir adamǵa aıyna 718,5 teńgeden aınalady. Ortasha statıstıkalyq páterler úshin kommýnaldyq qyzmetterdiń tólem somasy qatty turmystyq qaldyqtardy (QTQ) shyǵarý tarıfi kóterilse orta eseppen 1,4%-ǵa artady.
Kommýnaldyq qyzmetterge jumsalǵan shyǵystardy óteý úshin 2024 jyldyń 1 mamyrynan bastap halyqtyń áleýmettik osal toptaryna jatatyn 315 430 turǵynǵa 0,05 AEK (184,6 teńge) kóleminde ataýly áleýmettik kómek tólenetin bolady.
Qala ákimdiginiń málimetinshe, qoldanystaǵy tarıfter 2017 jyly bekitilgen. Osy kezeńde naryq qatysýshylary (qaldyqtardy jınaý uıymdary, qaldyqtardy suryptaý kásiporyndary jáne polıgon operatorlary) shyǵyndardyń aıtarlyqtaı óskenin atap ótti.
«QTQ shyǵarý tarıfi konteınerlik alańdardan qaldyqtardy jınaý jáne olardy qoqys suryptaý kásiporyndaryna tasymaldaý, qaldyqtardy suryptaý, paıdaly fraktsııalardy odan ári qaıta óńdeýge shyǵarý jáne polıgonda qaldyqtardy qabyldaý, olardy kómý boıynsha shyǵystardy qamtıdy. Aıta ketý kerek, 2017 jyldan bastap ortasha jalaqy 2 esege, dızel otynynyń ortasha quny 3 esege ulǵaıdy, arnaıy tehnıkanyń qosalqy bólshekterine shyǵyndar ósti »,-dep habarlady ákimdikten.
2024-2025 jyldary 671 konteıner alańynda 2 905 tereńdetilgen konteınerdi aýystyrý jáne ornatý josparlanǵan.
2024 jyldyń qańtar aıynda GPS-trekerlermen jaraqtandyrylǵan zamanaýı arnaıy tehnıkanyń, qaldyqtardy suryptaýǵa arnalǵan sharttardyń, tehnıkany jańartý jónindegi ınvestıtsııalyq baǵdarlamalar boıynsha qatysýshylarǵa qoıylatyn talaptarmen 5 jyl merzimge QTQ shyǵarýdaǵy ashyq tender ótkizildi.