Almatyda qoǵamdyq kólik jolaýshylarynyń 97 paıyzy jol aqysyn qolma-qol aqshasyz tóleıdi

<p>ALMATY. KAZINFORM &ndash; Almatyda qoǵamdyq kóliktegi qolma qol aqshasyz tólemniń birqatar túri bar. Bul týraly máslıhatynyń kezekten tys XXI sessııasy barysynda qalalyq mobıldilik basqarmasynyń basshysy Saǵyndyq Telibaev málimdedi.</p>

Basqarma basshysynyń aıtýynsha, jol aqysyn qolma-qol aqshamen tóleýdi alyp tastaý sharasy tasymaldaý qaýipsizdigin qamtamasyz etýge baǵyttalǵan, sebebi avtobýs júrgizýshisi aqsha jınaýǵa alańdamaı kólik quralyn basqarady. 

«Shynynda da, kóptegen adam qala qonaqtary men zeınetkerler qolma-qol aqsha tóleýge múmkindigi bolmaǵan kezde qıyndyqqa tap bolýy múmkin dep alańdaıdy. Biraq búginde jolaýshylardyń 97%-dan astamy jol aqysyn qolma-qol aqshasyz tóleıtinin, onyń ishinde zeınetkerlerdiń 90%-dan astam ekenin atap ótkim keledi. Zeınetkerlerdiń qalǵan bóligine qajet bolǵan jaǵdaıda kólik kartasyn alýǵa kómek kórsetiledi», - dedi basqarma basshysy. 

Ol búginde qolma-qol aqshasyz esep aıyrysýdyń birneshe ádisin atady:

- «Ońaı» fılıaldarynda jáne klıentterge qyzmet kórsetýdiń 115 pýnktinde satyp alýǵa bolatyn kólik kartasy arqyly;

- SMS arqyly;

- mobıldi qosymsha arqyly (sheteldik qonaqtarǵa yńǵaıly bolý úshin ınterfeısti aǵylshyn tilinde engizý pysyqtalýda)

«Almaty qalasynyń Kólik holdıngimen birlesip, biz tólemniń yqtımal nusqalary týraly aqparattardy ornalastyrý boıynsha jumysty jalǵastyramyz. Olardyń barlyǵy turǵyndar úshin yńǵaıly jáne qala qonaqtaryna túsinikti», - dedi Saǵyndyq Telibaev.

Osyǵan deıin Almatyda qoǵamdyq kólikte jol júrý aqysy 20 teńgege qymbattaǵany týraly jazǵan edik.