Almatyda qyzylsha juqtyrǵan 1994 balanyń 1880-i ekpe almaǵan

<p>Almatyda qyzylsha juqtyrǵandar azaımaı tur. Naýryzdan beri eki jarym myńnan astam adam osy dertke shaldyqqan, dep habarlaıdy <a href="Kazinform" target="_blank" rel="noopener">Kazinform</a>.</p>

Almaty qalasy sanıtarııalyq-epıdemıologııalyq baqylaý departamenti málimetinshe, qazir qyzylsha boıynsha epıdemıologııalyq jaǵdaı kúrdeli. Megapolıste naýryzdan bastap zerthanalyq jolmen rastalǵan 2509 jaǵdaı tirkeldi, onyń 1994-i 14 jasqa deıingi balalar arasynda (79,4 paıyz) anyqtaldy.

«Al byltyr qalada zerthanalyq jolmen rastalǵan qyzylsha men qyzamyq tirkelgen joq. Aýyrǵan 1994 balanyń 1880-i ekpe almaǵan (94,2 paıyz), onyń ishinde vaktsınatsııadan bas tartqan 1354 jaǵdaı bolǵan (72,02 paıyz), medıtsınalyq qarsy kórsetilimderi bar 260 jaǵdaı bolsa(13,8 paıyz), 259 jaǵdaıda (13,7 paıyz) ekpe alatyn jasqa jetpegen. Basqa sebeptermen ekpe almaǵan 6 jaǵdaı tirkelse (0,35 paıyz), ekpe týraly derekteri joq 1 jaǵdaı (0,05 paıyz) bolǵan»,- dep habarlady departamentten.

Qyzylshaǵa qarsy vaktsınatsııa – qyzylshany juqtyrýdy, sondaı-aq onyń asqynýyn boldyrmaıtyn jalǵyz tıimdi qural.

«Qyzylshaǵa qarsy josparly vaktsınatsııa 2 ret, birinshisi – 1 jasta (12-15 aı), ekinshisi – 6 jasta júrgiziledi, bul vaktsınatsııadan keıingi ımmýnıtetti kúsheıtýge múmkindik beredi. Osyǵan baılanysty ata-analardy óz balasynyń densaýlyǵyna jaýapkershilikpen qaraýǵa, ekpelerdi ýaqytynda alýǵa, sondaı-aq qyzylshaǵa qarsy qosymsha jappaı ımmýndaý sheńberinde balany vaktsınatsııalaýǵa shaqyramyz»,- dep atap ótti vedomstvodan.

Buǵan deıin ınfektsııalyq aýrýhanalar qyzylsha juqtyrǵan naýqasqa toly ekenin jazǵan bolatynbyz.