Almatyda Qyzyl kitapqa engen aǵashty otap tastady
– Kóshpeli tekserý barysynda jer resýrstaryn basqarý departamenti, polıtsııa basqarmasy jáne Túrksib aýdany ákimdiginiń ókilderiniń qatysýymen júrgizilgen tekserý nátıjesinde 50 jyldan asqan emen aǵashynyń zańsyz kesilgeni rastaldy, – dep habarlady qalalyq ákimdikten.
Atalǵan fakti boıynsha polıtsııa departamenti QR Qylmystyq kodeksiniń 340-baby («Aǵashtar men butalardy zańsyz kesý, joıý nemese zaqymdaý») boıynsha qylmystyq is qozǵady.
Almaty qalasyndaǵy jasyl jelekterdi kútip-ustaý jáne qorǵaý erejesine sáıkes, zańsyz kesilgen, joıylǵan nemese sırek jáne joıylý qaýpi bar ósimdikterdiń tizbesine engizilgen jasyl jelekterge qatysty sol túrdegi (qosymsha túrlerin) ósimdikterdiń ornyna júz ese kólemde aǵash otyrǵyzý qarastyrylǵan.
QR Qylmystyq kodekstiń 340-baby boıynsha 160 AEK-ke deıin aıyppul, túzeý jumystary, qoǵamdyq jumystarǵa tartý nemese múlikti tárkileı otyryp qamaýǵa alý túrindegi jaýapkershilik kózdelgen.
– Ekologııa jáne qorshaǵan orta basqarmasy ýákiletti organ retinde 2006 jylǵy 31 qazandaǵy № 1034 QR Úkimetiniń qaýlysymen bekitilgen «Sırek kezdesetin jáne joıylyp ketý qaýpi bar ósimdikter men janýarlar túrleriniń tizbesine» engizilgen jasyl jelekterdi kesýge ruqsat bermeıdi, – delingen habarlamada.
Eske sala ketsek, 2020 jyly Almatyda saýda úıiniń janynda (Áýezov-Tóle bı kósheleriniń qıylysy) jaıqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.
Almaty qalalyq Jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.
Bul jaǵdaıǵa Prezıdent Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.
Keıin merdigerlerge aıyppul salyndy.