Almatyda Kitap Fest kezinde 50-ge jýyq jańa kitaptyń tusaýy kesildi
Festıval qala kúni qarsańynda megapolıstiń eń iri mádenı is-sharalarynyń birine aınaldy.
2014 jyly bastaý alǵan festıval búginde ádebı mádenıetti nasıhattaýdyń biregeı platformasy retinde tanylǵan jáne bul dástúrden bıyl da jańylǵan joq.
Bıylǵy ereksheligi — festıval 10 jylda alǵash ret eki kún qatarynan ótti. «Keleshek kitaby» uranymen ótip jatqan mereıtoılyq festıval kelýshilerge túrli baǵdarlamalar usyndy.
Festıvaldiń negizin qalaýshy Juldyz Omarbektiń aıtýynsha, Kitap Fest Almaty kitapqa degen súıispenshiliktiń sımvolyna aınaldy.
— Kitap — ult rýhanııatyn damytyp, jas býyndy izgilikke tárbıeleýde asa mańyzdy rólge ıe. Kitap Fest-tiń basqa festıvalderden aıyrmashylyǵy nede? Birinshiden, Kitap Fest — Qazaqstandaǵy jalǵyz kitap festıvali. Ekinshiden, bul jaı ǵana kitap jármeńkesi emes, biz mádenıetti jáne oqýǵa degen súıispenshilikti nasıhattaımyz. Árbir kitaptyń óz oqyrmany bar. Sol sııaqty ár jazýshynyń da óz aýdıtorııasy bar. Jobanyń maqsaty oqyrman mádenıetin damytyp, jazýshylar men oqyrmanǵa kezdesý alańyn uıymdastyrý, — deıdi ol.
Festıvalge 70-ten astam kitap dúkeni men baspalar qatysty jáne 50-ge jýyq jańa kitaptyń tusaýy kesildi.
Atalmysh sharaǵa sheteldik qonaqtar da qatysty. Túrkııa elshiliginiń ókili Aıhan Korkmaz mundaı is-sharalar arqyly mádenı tájirıbe almasý jáne halyqaralyq baılanystardy nyǵaıtýdyń mańyzyna toqtaldy.
«Festıvaldiń 10 jyldyǵy óte keremet ótip jatyr! Mundaı sharalar qoǵam úshin ásirese jastar úshin óte mańyzdy. Bizdiń maqsat — eki el arasyndaǵy tereń, tarıhı jáne baýyrlastyq baılanysty kórsetý. Festıvalmen ári qaraı da yntymaqtastyǵymyzdy arttyramyz degen úmittemin, — dedi Túrkııa elshiliginiń ókili.
Eske salaıyq, buǵan deıin Almatyda ótken jyly 4 myńnan astam jańa kitap basylǵanyn jazǵanbyz.