Almatyda kenege qarsy dezınsektsııalyq óńdeý jumystary bastalady

<p>ALMATY. KAZINFORM &ndash; Almatyda 1 sáýirden bastap jalpy aýdany 2 366,56 ga quraıtyn ormandy alqaptarda, qala saıabaqtary men skverlerde kenege qarsy dezınsektsııalyq óńdeý jumystarynyń birinshi kezeńi bastalady.&nbsp;</p>

Almaty qalalyq sanıtarııalyq-epıdemıologııalyq baqylaý departamentiniń málimetinshe, óńdeý jumystarymen 8 ormandy alqap (1 904,924 ga), 100 qala saıabaǵy men skveri (461,636 ga) qamtylady jáne aýa-raıyn eskere otyryp, qurǵaq, jaýyn-shashynsyz kúnderi bekitilgen kestege sáıkes 1-27 sáýir aralyǵynda júredi. Kene entsefalıtine qarsy óńdeý jumysy eki kezeńde júrgiziledi (ekinshi kezeń: mamyr, maýsym aılary). 

«Dezınsektsııalyq is-sharany qalalyq sanıtarııalyq-epıdemıologııalyq baqylaý qyzmetiniń mamandarynyń tikeleı baqylaýymen QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń «Ulttyq saraptama ortalyǵy» ShJQ RMK «Almaty qalasy boıynsha dezınfektsııa ortalyǵy» fılıaly júrgizedi. Jasaqtalǵan dezınfektsııalyq brıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan. Kene entsefalıtine qarsy dezınsektsııalyq óńdeý jumystaryn júrgizý úshin «Delteks SC 10» ınsektoakarıtsıdti preparaty qoldanylady. Preparat az ýytty jáne qaýiptiligi tómen sanatqa jatqyzylady (3-4 klass). Kenelermen kúresý úshin qoldanylatyn dozalar eń az jáne adamdar men janýarlar úshin qaýipsiz sanalady. Óńdeý jumystary tańǵy ýaqytta júrgiziledi. Óńdeletin aýmaqtardyń shekaralarynda «Kenelerge qarsy óńdeý júrgizilýde» degen eskertý habarlamalary bar taqtalar ornatylady», - dep habarlady vedomstvonyń baspasóz qyzmeti. 

Osyǵan baılanysty epıdemıologtar qala turǵyndary men qonaqtaryna saqtyq sharalaryn saqtaýǵa shaqyrdy:

- ınsektoakarıtsıdti preparattyń eritindisin denege nemese kıimge tıgizip almas úshin, kenege qarsy dezınsektsııalyq óńdeý jumystary júrgizilgen jerlerden qashyqtaý júrý kerek;

- jerdegi shashyratqan preparattar qurǵaǵansha úı janýarlaryn óńdeý jumystary júrgizilgen aımaqqa jibermeý kerek;

- óńdeý jumystary júrizilgen jerlerden 40 kún boıy sańyraýqulaqtardy, shópterdi jáne jıdekterdi jınaýǵa, paıdalanýǵa bolmaıdy (preparatty qoldaný jónindegi nusqaýlyqqa sáıkes).

Eske salaıyq, buǵan deıin Almatyda tasqynnan japa shekken óńirlerge gýmanıtarlyq kómek qabyldaıtyn pýnkt ashylǵan habarlaǵan edik.