Almatyda kelesi jyly elektr kólikterin qýattaıtyn 150 qurylǵy ornatylady
Jıyn barysynda Almaty ákimi Erbolat Dosaev jol ınfraqurylymyn jaqsartý men qoǵamdyq kólikti damytý josparyna toqtaldy. Onyń aıtýynsha, bıyl qalanyń 70 kóshesinde 25 shaqyrym jańa jol salyndy. Kelesi jyly Aqjar, Alǵabas, Álmerek, Qaırat, Shańyraq-1, Shuǵyla, Rahat-Mádenıet, Terekti shaǵyn aýdandarynda barlyǵy 70 shaqyrym jol salý josparlanyp otyr. Bıyl 200 shaqyrym jol ortasha jóndeýden ótse, kelesi jyly qalanyń jańa aýdandarynda 23 mlrd teńgege 250 shaqyrym jolǵa ortasha jóndeý júrgiziledi.
«Memleket basshysynyń tapsyrmasyna sáıkes, gaz ben elektr tartqyshqa aýystyrý arqyly qoǵamdyq kólikterdi ekologııalandyrý jumystary bastaldy. Bıyl 750 ekologııalyq taza avtobýs satyp alyndy, onyń 600-i qalalyq bıýdjet esebinen alyndy. Sońǵy 11 jylda Almatyda alǵash ret trolleıbýs parkin jańartý bastalyp, 100 trolleıbýs satyp alyndy. Bul rette, kelesi jyldan bastap Almatyda dızeldi avtobýstar satyp alynbaıdy. 2024 jyly jalpy somasy 88,3 mlrd teńgege taǵy 600 avtobýs, 100 trolleıbýs, sonymen qatar, 100 elektrobýs, 2025 jyly taǵy 100 elektrobýs satyp alýdy josparlap otyrmyz», - dedi qala ákimi.
Sondaı-aq qala ákimi elektr kóligin damytý úshin 2024 jyly trotýarlyq jáne alańdyq avtoturaqtarda 150 elektr qýattaý qurylǵysy ornatylatynyn, ol úshin 10 áleýetti jeke ınvestor tartylǵanyn aıtty.