Almatyda Qazaqstan men Reseıdiń úkimet basshylary kelissózder júrgizdi
Kelissózder Eýrazııalyq úkimetaralyq keńes otyrysynyń qarsańynda ótti, dep habarlaıdy Úkimettiń baspasóz qyzmeti.
Taraptar saýda, ınvestıtsııa, ónerkásiptik kooperatsııa, energetıka, kólik jáne logıstıka, aýyl sharýashylyǵy jáne bilim berý salalaryndaǵy memleketaralyq yntymaqtastyqtyń keń aýqymdy máselelerin talqylady.
Atap aıtqanda, qazaqstandyq kómirdi RF aýmaǵy arqyly tasymaldaý, sondaı-aq qazaqstandyq tasymaldaýshylardyń Reseıge kirýine qatysty problemalardy sheshý máseleleri jan-jaqty talqylandy.
Álıhan Smaıylov eki memleket basshylarynyń saıası erik-jigeriniń arqasynda QR men RF arasyndaǵy qarym-qatynastar ózara syılastyq qaǵıdattary negizinde ilgeri damyp kele jatqanyn atap ótti.
«Reseı – Qazaqstannyń negizgi saýda-ekonomıkalyq seriktesteriniń biri. Buǵan ótken jyldyń 11 aıyndaǵy kólemi $24 mlrd bolǵan saýda aınalymy dálel», - dedi ol.
Úkimet basshysynyń aıtýynsha, Qazaqstan óńiraralyq jáne shekaralyq yntymaqtastyqty damytýǵa úlken kóńil bóledi. Bul baǵytta Óńiraralyq yntymaqtastyq forýmy tıimdi alań bolyp tabylady.
«Bıylǵy jyly túrli deńgeıdegi ózara baılanystar men birlesken is-sharalar kóp bolatynyna senimdimin. Qazaqstan Úkimeti barlyq sala boıynsha tolyq formatty jáne ózara tıimdi yntymaqtastyqty damytýǵa daıyn», — dedi Álıhan Smaıylov.
Mıhaıl Mıshýstın dástúrli qonaqjaılylyq úshin alǵysyn bildirip, Reseı Qazaqstanmen ózara tıimdi qarym-qatynastardy nyǵaıtýǵa asa mán beretinin atap ótti.
«Biz ónerkásip, mashına jasaý, energetıka, munaı-hımııa, kólik ınfraqurylymy, tsıfrlyq ekonomıka jáne basqa da kóptegen salalarda iri ınvestıtsııalyq jobalardy birlesip júzege asyryp jatyrmyz. Biz jańa óndiristik tizbekter qurylysyn jedeldetýdi usynyp otyrmyz. Buǵan Reseı men Qazaqstannyń ekonomıkalyq, óndiristik jáne tehnologııalyq áleýetteriniń ózara birin-biri tolyqtyrýy jaqsy negiz bolyp tabylady»,— dedi RF Úkimetiniń tóraǵasy.