Almatyda Qazaqstan men Reseı volonterlik uıymdarynyń sleti ótti
Slettiń ashylýyna QR Mádenıet jáne aqparat mınıstri Aıda Balaeva, sondaı-aq Reseı Federatsııasy Prezıdentiniń shet eldermen óńiraralyq jáne mádenı baılanystar jónindegi basqarmasy basshysynyń orynbasary Anton Rybakov, eki eldiń volonterlik qozǵalys ókilderi qatysty.
Aıda Balaeva jınalǵandardy aldaǵy Halyqaralyq volonter kúnimen quttyqtap, memleket pen volonterlik qaýymdastyq arasyndaǵy seriktestiktiń mańyzdylyǵyn atap ótti.
«Qazaqstan Prezıdenti Qasym-Jomart Toqaev volonterler qyzmetine úlken kóńil bólýde. Memleket basshysy, ásirese, saladaǵy halyqaralyq yntymaqtastyqty damytýǵa basa nazar aýdaryp otyr. Búgin biz Qazaqstan men Reseıdegi volonterler qozǵalysy qýatty kúshke, meıirimdi azamattardyń judyryqtaı jumylýynyń jarqyn úlgisine, halyqtar arasyndaǵy baılanystardy nyǵaıtatyn, mańyzdy áleýmettik máselelerdi sheshýge yqpal etetin qozǵalysqa aınaldy dep senimmen aıta alamyz», – dedi mınıstr.
Sondaı-aq, Aıda Balaeva Memleket basshysynyń bastamasymen 2020 jyldyń Qazaqstanda Volonterler jyly dep jarııalanǵanyn, bul volonterler qozǵalysyna qýatty serpin bergenin aıtyp, Qazaqstandaǵy volonterlikti memlekettik qoldaý sharalaryna toqtaldy.
Memlekettik organdar jyl saıyn volonterler qaýymdastyǵymen birlesip 50-den astam jobany júzege asyryp, bastamalardy iske asyrý úshin 240 shaǵyn grant beredi.
Búginde elimizde 240 myńnan astam belsendi volonter bar, 740-tan astam volonterlik uıymdar men myńnan astam bastamashyl top jemisti jumys istep keledi.
Sóz sońynda mınıstr 2025 jyly tabıǵatty qorǵaýǵa baǵyttalǵan is-sharalardy ózekti etý maqsatynda birlesken ekologııalyq aktsııalar, kórmeler, semınarlar men konferentsııalar ótkizýdi usyndy.
Volonterler sletinde sóz sóılegen Reseı Federatsııasy Prezıdenti Ákimshiliginiń shet eldermen óńiraralyq jáne mádenı baılanystar basqarmasy basshysynyń orynbasary Anton Rybakov Qazaqstanǵa is-sharany uıymdastyrǵany úshin alǵys aıtty.
«Birlesken jobalardy sapalyq turǵyda jańa deńgeıge kóterýdegi negizgi bastamashylardyń biri – Qazaqstan Prezıdenti Qasym-Jomart Toqaev. Bul biz úshin óte mańyzdy. Qazaqstan volonterlermen jumys isteýde úlken tájirıbege ıe. Biz bul baǵytty tolyq qoldaımyz jáne búgingi kezdesýdiń mańyzdylyǵy kelesi jyly, biz josparlaǵandaı, Reseı men Qazaqstan volonterleriniń «Tatý kórshilik» atty tolyqqandy forýmy ótetininde dep bilemiz. Bul bizdiń elderimiz arasyndaǵy birlesken jobalar portfelin baıyta túsedi dep senemin. Volonterlik ıdeıany nasıhattaý jáne volonterlik qozǵalysqa kóbirek adam tartý qoǵamdy biriktirýge, dástúrli moraldyq jáne rýhanı qundylyqtardy nyǵaıtýǵa yqpal etedi», – dedi ol.
Slet aıasynda volonterler úshin tanymdyq dárister, semınar-trenıngter uıymdastyryldy.
Sondaı-aq reseılik qonaqtarǵa Almaty qalasyndaǵy komıýnıtı ortalyqtarynyń jumysy tanystyryldy.