Almatyda «qaıyrymdylyq qorynan úı alyp beremin» dep qomaqty qarajat jymqyrǵan kúdikti ustaldy

<p>ALMATY. KAZINFORM - Almaty polıtsııasy bes adamdy aldady degen kúdikke ilingen 29 jastaǵy turǵyndy ustady.</p>

Almaly aýdandyq polıtsııa basqarmasynyń málimetinshe, kúdiktige qatysty birneshe ret jasalǵan alaıaqtyq boıynsha qylmystyq is tergelip jatyr. Er adam kem degende bes adamdy aldady degen kúdikke ilindi.

«Zańsyz áreketter baspanaǵa muqtaj birneshe azamattyń iri kólemdegi aqshasyn joǵaltqan kezde belgili boldy. Olar ózin qaıyrymdylyq uıymdarynyń biriniń qyzmetkerimin dep tanystyrǵan beıtanys adamǵa 7 mıllıon teńge bergen. Qaskóı olarǵa qaıyrymdylyqtan jáne qordan baspana berýge ýáde berdi. Alaıda aıtqan sózin oryndamaı aldap ketti. Jedel is-sharalar júrgizilip, kúdikti ustaldy», - dedi Almaly aýdandyq Polıtsııa basqarmasynyń bastyǵy Oljas Sháripov.

Kúdikti ýaqytsha ustaý ızolıatoryna ornalastyryldy.

Eske salaıyq, buǵan deıin Almaty oblysynda memleket qarjysyn jymqyrǵandardan 653 mln teńge zalal kelgenin jazǵanbyz.