Almatyda kásipker memlekettik ınspektordy soqqyǵa jyqty

<p>ALMATY. KAZINFORM — Almatyda qalalyq jer resýrstaryn basqarý departamentiniń memlekettik ınspektoryna pyshaqpen shabýyl jasaldy. Kúdikti ustaldy.</p>

Aýyl sharýashylyǵy mınıstrliginiń baspasóz qyzmeti málim etkendeı, osy maýsym aıynda departamentke kelip túsken ótinish negizinde kásipkerge qatysty Jer zańnamasynyń saqtalýyna tekserý jumystary bastalǵan. 

«Tekserý barysynda kásipker A. qujatsyz ýchaskede saýda pavılonyn ornatyp, jalpy aýdany 0,0012 ga memlekettik menshik jerin óz betinshe ıelengeni anyqtaldy. Onyń negizinde Ákimshilik quqyq buzýshylyq týraly kodekstiń 136-baby boıynsha shara qabyldandy jáne 21 maýsymda osy pavılondy bir aılyq oryndaý merzimimen buzý jóninde nusqama berilgen bolatyn», — delingen mınıstrlik málimdemesinde. 

Buıryqty oryndaýdan bastartqan kásipker departament ınspektoryna pyshaqpen shabýyl jasaǵan.

«Qazirgi tańda qyzmetker medıtsınalyq mekemege jatqyzyldy. Jábirlenýshide pyshaq jaraqattary joq, murny synǵan, kóz aınalysyna zııan kelgen», — dep atap ótti vedomstvodan. 

Almaty qalalyq polıtsııa departamenti kúdiktiniń ustalǵanyn jetkizdi.

«Qarý qoldaný arqyly jasalǵan buzaqylyq deregi boıynsha qylmystyq is qozǵaldy. Kúdikti ustalyp, ýaqytsha ustaý ızolıatoryna qamaldy. Sot úıqamaq túrindegi bultartpaý sharasyn tańdady. Qylmystyq qarý tárkilendi. Basqa da mán-jaı anyqtalyp jatyr», — dep habarlady Almaty qalalyq polıtsııa departamentinen.