Almatyda qaraýsyz qalǵan janýarlardy aýlaıtyn brıgadalar sany kóbeıedi - Berik Soltanbaev

<p>Kelesi jyldan bastap Almatyda buralqy janýarlardy aýlaý úshin ár aýdan ákimdigi tarapynan qosymsha brıgadalar bólinedi. Bul týraly qalalyq máslıhattyń kezekten tys XII sessııasynda Almaty qalasynyń kásipkerlik jáne ınvestıtsııalar basqarmasynyń basshysy Berik Soltanbaev aıtty, dep habarlaıdy <a href="https://kaz.inform.kz/news/hanter-baydenge-zhana-ayip-tagildi-4f9783/Kazinform" target="_blank" rel="noopener">Kazinform.</a></p>

Spıkerdiń sózinshe, buralqy janýarlardy aýlaý jumystarynyń jedeldigin arttyrý úshin bıyl qalalyq veterınarııalyq qyzmet shtaty 22 birlikke ulǵaıǵan jáne aýlaý qyzmetkerleriniń jalaqysy 30%-ǵa artqan. Arnaıy tehnıkanyń 12 birligin jetkizýge kelisimshartqa qol qoıyldy, bul brıgadalar sanyn 2,6 esege arttyrýǵa múmkindik beredi. Aýlaý tıimdiligin arttyrý úshin kelesi jyldan bastap aýdan ákimderine 2 brıgadadan bekitiledi. 

Qala ákimi Erbolat Dosaev megapolıste qaraýsyz qalǵan úı janýarlarynyń kóbeıip kele jatqanyn aıtty. 

«Buralqy janýarlardyń sanyn retteýdi izgilendirý maqsatynda biz olardy aýlaımyz, ekpe egemiz, chıpteımiz, biraq, ıtterdi qaıtadan jibere salýǵa májbúrmiz. Sebebi, qalada bar arnaıy qabyldaǵyshtardyń sanyn eskersek, bizde barlyq ıtti ustaýǵa múmkindik joq. Men eriktilerge, buralqy janýarlardy kútýge, olardy jańa otbasylaryna qosýǵa kómektesetin adamdarǵa alǵys aıtqym keledi. Aldaǵy jyly aýlaýmen jumysty jaqsartý jáne qaraýsyz qalǵan janýarlarmen máseleni sheshý úshin qosymsha sharalar qabyldaý qajet», - dep atap ótti Erbolat Dosaev. 

Aıta keteıik, Almatyda qaraýsyz qalǵan janýarlardy aýlaý úshin kún saıyn 6 brıgada jumys isteıdi. Olar janýarlardy dıagnostıkalaıtyn, tekseretin, emdeıtin jáne zararsyzdandyratyn ýaqytsha ustaý pýnktine aparady. Ustaý, zararsyzdandyrý, vaktsınalaý jáne bosatý baǵdarlamasy boıynsha Almatyda búgingi kúni 1 428 ıt, 64 mysyq shyǵaryldy, olarǵa zooeriktiler men zoobelsendiler qamqorlyq jasaıdy.