Kásibı merekege oraı Almaty qalasy Mádenıet basqarmasynyń basshysy Ǵanı Maılybaev óner men rýhanııat salasyndaǵy jetistikterdi saralap, aldaǵy josparlarmen bólisti.
Onyń aıtýynsha, búgingi kúni elimizdiń mádenı astanasy — Almatyda 12 teatr, 35 kitaphana, 25 mýzeı, 20-ǵa jýyq kınoteatr men ózge de mádenı oshaqtar jumys isteıdi. Almaty ákimdigine qarasty mekemeler qatarynda — «Alataý» dástúrli óner teatry, Memlekettik qýyrshaq teatry, «Almaty áýenderi» shyǵarmashylyq ujymdary, Qazaq memlekettik tsırki, 8 mýzeıden turatyn Almaty mýzeıler birlestigi, Memlekettik arhıv, Almaty haıýanattar baǵy men Ortalyqtandyrylǵan kitaphanalar júıesine kiretin 28 kitaphana bar. Bul uıymdarda 2 myńnan astam mádenıet qyzmetkeri eńbek etedi.
Mádenıet basqarmasynyń málimetinshe, aldaǵy ýaqytta Almatyda mádenı nysandardyń sany artady. Atap aıtqanda:
— Jýyrda jastar teatry men jańa kórme ortalyǵynyń qurylysy bastalady.
— Inklıýzıvti mádenıet úıiniń jobalaý-smetalyq qujattamasy ázirlenip jatyr.
— Boraldaı qorǵandarynda Saq mádenıeti ortalyǵynyń qurylysy bastalady.
— TMD elderi ishinde alǵashqy Balalar ǵylym mýzeıi men Observatorium mýzeıiniń ashylýy, Raıymbek batyr keshenin mýzeılendirý men Almaty mýzeıiniń jańa ekspozıtsııasyn qalyptastyrý jumystary bastalady.
Sonymen qatar 2029 jylǵa deıin qalada ózine-ózi qyzmet kórsetý júıesimen jabdyqtalǵan 20 jańa kitaphana ashý kózdelgen.
Eske salaıyq, buǵan deıin Almatyda alǵashqy Ǵylym mýzeıiniń qurylysy qashan bastalatynyn jazǵanbyz.