Almatyda Qanat Islamnyń uıymdastyrýymen boks keshi ótedi
Bul týraly ol óziniń Instagram áleýmettik jelisinde jazdy.
«Qurmetti qazaq eli! 2024 jyly 26 qańtar kúni Balýan Sholaq atyndaǵy sport saraıynda Rýslan Myrsataev bastaǵan qazaqstandyq bylǵary qolǵap sheberleri halyqaralyq kásipqoı boks keshinde sharshy alańǵa shyǵady. Bul Uly Jibek jolynyń on jyldyǵy aıasynda uıymdastyrylatyn úlken is-shara bolmaq.
Boks álemine bizdiń ujym Jánibek Álimhanuly, Aıdos Erbosynuly, Alı Ahmetov sııaqty boksshylardy tanytty. Osydan keıin kompanııa jıi boks keshterin uıymdastyrýǵa bel býyp otyr.
Elimiz boıynsha ár oblysta 10 myńnan astam boksshylar boks sektsııalaryna barady. Bizdiń maqsatymyz – halyqaralyq deńgeıdegi jarystar uıymdastyra otyryp, jastardyń sportqa qyzyǵýshylyǵyn týdyrý jáne boks keshi arqyly qazaq batyrlaryn álemdik kásipqoı sharshy alańyna tanytý. Meniń maqsatym artymnan ergen jastarǵa qolymnan kelgenshe kómekteskim keledi. Bul - meniń jumysym, mindetim. Osy jarysty uıymdastyrýǵa demeýshi bolýǵa daıyn azamattar, kompanııalar bolsa, birge jumys isteýge daıynbyz», - dep jazdy ol.
Esterińizge sala keteıik, osydan birer kún buryn Almaty qalasyndaǵy Balýan Sholaq atyndaǵy sport saraıynda taǵy bir boks keshi ótken bolatyn. Sol kásipqoı boks keshiniń basty jekpe-jeginde Janqosh Turarov japondyq qarsylasy Akıhıro Kondony aıqyn basymdyqpen utyp, ekinshi chempıondyq beldikke qol jetkizgen edi.