Almatyda IT-ekojúıeni damytýǵa qansha ınvestıtsııa tartyldy

<p>ALMATY. KAZINFORM &mdash; Almatyda sońǵy eki jylda IT-ekojúıeni damytýǵa 19,2 mln AQSh dollary (9,9 mlrd teńge) ınvestıtsııa tartyldy.</p>

Qalalyq tsıfrlandyrý basqarmasynyń málimetinshe, Almatyda 2022–2024 jyldarǵa arnalǵan «Almaty IT-ekojúıesin damytý» úsh jyldyq jobasy júzege asyrylyp jatyr.

Joba smart-qalalar, jasandy ıntellekt, úlken derekter jáne turaqty damý sııaqty negizgi baǵyttarda IT-ekojúıeni damytýǵa jáne startaptardy qoldaýǵa baǵyttalǵan.

MOST is-sharalaryna 7 myńnan astam adam qatysty. Tartylǵan ınvestıtsııalardyń jalpy somasy 19,2 mln AQSh dollary, al startaptardyń jıyntyq tabysy 5,37 mlrd teńgege jetti. Joba aıasynda 2 049 jumys orny ashyldy.

Joba aıasynda 1 189 IT-maman men 101 kásipker oqytyldy.

Sonymen qatar, «Digital Urban Planner, Smart City Engineer» baǵdarlamasy boıynsha 55 maman daıarlandy.

Osyǵan deıin almatylyqtardyń ortasha aılyq jalaqysy 6,1 paıyz ósti.