Almatyda ınklıýzıvti kitaphanalar ashyldy
Almaty ákmidiginiń málimetinshe, bul kitaphanalarda mátindi taktıldi formatta kórsetetin Braıl dıspleıleri, Braıl qarpinde basyp shyǵarýǵa arnalǵan prınterler, mátinniń kontrastyn úlkeıtýge jáne ózgertýge arnalǵan qurylǵylar men mátindi oqıtyn, ony daýystap oınatatyn jáne aýdıoformatqa aýdaratyn skanerler ornatylǵan.
Aýdıokitaptardy tyńdaý yńǵaıly bolý úshin kitaphanalarda dybys sapasy joǵary qulaqqaptar da bar. Buǵan qosa, beıimdelgen baǵdarlamalyq jasaqtamasy bar kompıýterler ornatylǵan, bul kórý jáne estý qabileti nashar adamdarǵa aqparatpen tıimdi jumys isteýge septigin tıgizedi.
Estý jáne kórý qabileti buzylǵan adamdar myna kitaphanalarǵa bara alady:
— Jambyl atyndaǵy jasóspirimder kitaphanasy;
— «Alatau Creative Hub» haby;
— Chehov atyndaǵy ortalyq qalalyq kitaphana ;
— Qazaqstan jazýshylarynyń kitaphanasy;
— №4, 14 jáne 45 fılıaldar.
Bul jerlerde aqparattyq resýrstardy paıdalaný yńǵaıly bolý úshin barlyq jaǵdaı jasalǵan. Bastama mádenı nysandarǵa teń qoljetimdilik pen kedergisiz orta qurý qaǵıdasy aıasynda qala ákiminiń tapsyrmasymen júzege asyryldy.
Aıta keteıik, bul kitaphanalarda kórý qabileti nashar qyzmetkerler de jumys isteıdi. Olar oqyrmandarǵa qural-jabdyqty úırenýge, qajetti resýrstardy izdeýge jáne oqytýǵa kómek kórsetedi. Bul jumys oryndaryn qurýǵa jáne qalanyń barlyq turǵyny úshin mádenıet pen bilimge degen qoljetimdilikti arttyrýǵa múmkindik beredi.
Jalpy, Almaty kitaphanalarynda 400-ge jýyq adam jumys isteıdi. 2023 jyly qala ákiminiń bastamasymen qyzmetkerlerdiń jalaqysy 30%-ǵa ósti, 2024 jyly jalaqy taǵy 25%-ǵa ulǵaıdy, al bıyl taǵy 29%-ǵa kóbeıedi.
Qalada ákimdikke qarasty 28 kitaphana jumys isteıdi, onyń 95%-y jańǵyrtylǵan. Jyl saıyn Almaty kitaphanalaryna kelýshilerdiń jalpy sany 3 mıllıonnan asady.
Osyǵan deıin QR Mádenıet jáne aqparat vıtse-mınıstri Evgenıı Kochetov nashar kóretin adamdarǵa arnalǵan kitaphanalardyń sanyn arttyrýǵa qatysty pikir bildirgen bolatyn.