Almatyda hostelde bolǵan órt týraly sońǵy málimetter
Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33–te túsken. Birinshi órt sóndirý bólimi shaqyrtý ornyna 7 mınýt ishinde jetti.
«Kelgen boıda 1-qabaty jáne jertólesi jataqhanaǵa aınalǵan 3 qabatty turǵyn úıdiń janyp jatqany anyqtaldy. Aldyn ala aqparat boıynsha órttiń jalpy aýdany — 30 sharshy metr. Qabyldanǵan sharalarmen órt 06:22–de joıyldy», — dep habarlady departamentten.
Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy.
«Onyń jaǵdaıy ortasha aýyrlyqta, turaqty dep baǵalanyp otyr. Ekinshi naýqas barlyq tekserýden keıin usynystarmen ambýlatorlyq emdelýge jiberildi», — dep habarlady vedomstvodan.
Hostelden 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.
«Qazir 56 adam jaqyn mańdaǵy mektepke ýaqytsha ornalastyryldy. Ystyq tamaq berildi, qajetti medıtsınalyq jáne psıhologııalyq kómek tolyq kólemde kórsetiledi. Bir saǵat ishinde aýdannyń qonaq úılerine ornalastyrylady», — dep habarlady qalalyq ákimdikten.
Almaty qalalyq Tótenshe jaǵdaılar departamentiniń basshysy Nurlan Atyǵaevtyń aıtýynsha, evakýatsııalanǵan adamdardyń kóbi — sheteldikter.
«Hostel ákimshiliginiń sózinshe, óz betimen syrtqa shyqqan adamdardyń deni Ózbekstan, Qyrǵyzstan, Pákistan elderiniń azamattary. Aralarynda qazaqstandyqtar da bar. Qaza tapqandardyń kim ekeni anyqtalyp jatyr», — dedi ol.
Sonymen qatar departament basshysy órtke oranǵan hosteldiń ashylǵanyna bir jarym aı bolǵanyn málim etti. Ondaǵy bir oryn quny 2000 teńgeden bastalǵan, oryndar sany — 100-ge deıin.
Almaly aýdanynyń ákimi Aıdar Jaqybaevtyń aıtýynsha, hostelde turǵandardyń deni — stýdentter men jas jumysshylar. Pákistan men Úndistannan kelgen medıtsına ýnıversıtetiniń stýdentteri de bar.
QR Premer-Mınıstri Álıhan Smaıylovtyń ókimimen órt sebebin tekserý jáne onyń saldaryn joıý jónindegi Úkimettik komıssııa quryldy. Onyń quramyna memlekettik jáne quqyq qorǵaý organdarynyń basshylary, sondaı-aq Almaty ákimdiginiń ókilderi kirdi. Úkimettik komıssııa órt saldarynan bolǵan qaıǵyly jaǵdaıdyń sebepterin jan-jaqty tekserý jumystaryna dereý kirisip, zardap shekkenderge birinshi kezektegi kómek kórsetedi.
Almaty ákimdigi taratqan málimetke sáıkes, Ádı Sháripov kóshesindegi «Almaty Hostel» Halyk Bank menshigindegi ǵımaratta ornalasqan.
«Hostel bir jarym aı buryn ashylǵan, ǵımarat Halyk Bank-ke tıesili. Bank ony kepilmúlik retinde jalǵa bergen. Bul hostel Almaty qalasynyń joǵary oqý oryndarymen stýdentterdi ornalastyrý úshin yntymaqtastyq týraly memorandýmǵa qol qoıǵan joq», — dep habarlady ákimdikten.
Ákimdik málimeti boıynsha, qaza tapqandardyń kóbi — qazaqstandyqtar.
«Qaıtys bolǵandardyń kóbi — qazaqstandyqtar. Bireýi — Ózbekstan azamaty, bireýi — Saha Respýblıkasynyń (RF) azamaty, qalǵandary — qazaqstandyqtar. Qazir qujattaryn tekserip, qarap jatyr. Jalpy, jertóleni sanıtarlyq talaptarǵa sáıkes jasaqtaýǵa bolady. Biraq osynshama kóp adamdy ornalastyrýǵa ruqsat bar ma, bul suraqtyń basy ashyq. Anyqtaımyz, tergeý júredi», — dedi Almaty ákimi Erbolat Dosaev.
Órttiń shyǵý sebepterin tekserý úshin mınıstr, general-maıor Syrym Sháriphanovtyń basshylyǵymen TJM-nyń jedel toby oqıǵa ornyna attandy. QR Qylmystyq kodeksiniń 292-babyna sáıkes qylmystyq is tirkeldi.
Almaty qalasynyń Tótenshe jaǵdaılar departamenti shuǵyl jelini iske qosty.
Habarlasýǵa bolatyn telefon nomerleri:
- 8 727 278 20 83
- 8 727 278 20 84
Qazaq tapqandardyń toǵyzy — qazaqstandyq, qalǵany sheteldikter.
«Mert bolǵan 13 adamnyń tórteýi — sheteldikter (Reseı Federatsııasynyń 2 azamaty jáne Ózbekstannyń 2 azamaty), qalǵan toǵyzy — Qazaqstan Respýblıkasynyń azamattary. Sot-medıtsınalyq saraptama taǵaıyndaldy», — dep habarlady Almaty qalalyq Polıtsııa departamentiniń baspasóz qyzmetinen.
Almatydaǵy hostelde turyp jatqan stýdentter órt bastalǵan kezde ǵımarattan qalaı shyqqanyn aıtyp berdi.
«Órt bolyp jatqanyn estip, qujattarymyzdy, kıimderimizdi alyp shyqtyq. Birinshi qabatta turamyn. Qasymdaǵylar da aman. Bólmemiz syrtqy esikke jaqyn ornalasqan. Shyǵa almaǵandar, terezeden shyqty. Keıbiriniń qujaty ishte qaldy. Men ózim Iemennen keldim. Bul jerde turyp jatqanyma kóp ýaqyt bolmady», – deıdi stýdentterdiń biri.
Hostel ǵımaratynyń ıesi – «KÝSA Halyq» JShS. Jalǵa alǵan – «ALA Hostel» JShS. Jaldaý týraly kelisimshart bıyl 21 qyrkúıekte jasalǵan. Almaty ákimdiginiń málimetinshe, jer ýchaskesiniń nysanaly maqsaty – dúkendi paıdalaný jáne qyzmet kórsetý.
«Bul nysan bir jarym aı buryn hostelge aınalǵan. Hosteldiń alańy – 457 sharshy metr. Aıta ketý kerek, «Sáýlet, qala qurylysy jáne qurylys qyzmeti týraly» QR zańyna sáıkes úı-jaılardy qaıta jabdyqtaý kezinde ruqsat qujattaryn alý kerek. Bul rette Almaty qalalyq josparlaý jáne ýrbanıstıka basqarmasy qaıta jabdyqtaýǵa arnalǵan bastapqy ruqsat qujattaryn (APZ, sheshim) bermegen. Dúkennen hostelge fýnktsıonaldyq maqsaty ózgergen kezde sanıtarlyq-epıdemıologııalyq, qurylys talaptary men órt qaýipsizdigi erejelerin oryndaý qajet. Sanıtarlyq-epıdemıologııalyq talaptardyń 23-tarmaǵyna sáıkes hosteldi jertóle jáne jertóle qabattarynda ornalastyrýǵa tyıym salynady», - delinedi habarlamada.
Almaty ákimdigi jerleý rásimin uıymdastyrýǵa jáne qaza tapqandardyń denesin tasymaldaýǵa kómektesedi.
Jerleýdi uıymdastyrý máseleleri boıynsha qaza tapqandardyń týystary myna baılanys nómirlerine júgine alady: + 7 707 779 07 08, +7 777 312 08 08.
Memleket basshysy qaza tapqan Qazaqstannyń jáne shetel azamattarynyń jaqyndary men týǵan-týystaryna kóńil aıtty.
«Qaıǵyly jaǵdaıǵa kináliler zań boıynsha jaýapqa tartylady. Úkimet pen ákimdikke zardap shekkenderdiń otbasylaryna kómek kórsetý tapsyryldy», - dep jazylǵan habarlamada.