Almatyda fıtnes jattyqtyrýshy atyp óltirgen azamatqa sot úkimi shyqty
Qalalyq sot málimetine sáıkes, sottalýshylar A. men I. 2023 jyly hostelde turǵan. Osy hostelde Damır Túrebaev ta turdy. 2023 jyldyń shilde aıynda Túrebaev mas kúıde qolyna balta alyp, A.-ny urýǵa nıettengen. Alaıda A. odan qashyp, bólmesine kirip, esikti ishinen jaýyp alǵan.
Jábirlenýshige ekinshi kórshisi — sottalýshy I. kezdesip, ol Túrebaevty tynyshtandyrýǵa tyrysqan. Biraq jábirlenýshi oǵan da baltasyn kótergen. Nátıjesinde I. A.-nyń bólmesine kirip, esikti ishinen jaýyp aldy.
— T. esikke baltamen soqqy berip, ony buzyp kirmek boldy. Osy sátte sottalýshy A. oqtalǵan qarýmen qarýlandy. T. bólmege kirip, sottalýshylarǵa baltamen soqqy berýge tyrysty, A. jábirlenýshige oq atty. Nátıjesinde T. oq jaraqatynan oqıǵa ornynda qaza tapty, — dep habarlady sot baspasóz qyzmeti.
Sot málimetinshe, bul mán-jaılardyń barlyǵy jataqhanada turatyn kýágerlerdiń aıǵaqtarymen, marqumnyń qanynda alkogoldiń bar ekendigi týraly saraptama qorytyndysymen jáne sottalýshylar turǵan bólmeniń esigine balta soqqysynyń izderi, sondaı-aq is boıynsha basqa da dáleldemelermen rastaldy.
— Sot A.-nyń áreketin kisi óltirý (QR QK 99-baby) babynan qaıta kvalıfıkatsııalap, qajetti qorǵaný sheginen asyp ketken kisi óltirý (QR QK 102-baby) retinde anyqtady. Sot úkimimen A. (QR QK 102-babymen) kináli dep tanylyp oǵan 2 jylǵa bas bostandyǵynan aıyrý jazasy taǵaıyndaldy. QR QK 60-babynyń 1-shi bólimine sáıkes, 2017 jyldyń 28 naýryzynda Oral qalalyq sotynyń úkimimen taǵaıyndalmaǵan 3 jyl bas bostandyǵynan aıyrý jazasynyń ótelmegen bóligi tolyǵymen qosylyp oǵan 5 jylǵa bas bostandyǵynan aıyrý jazasy taǵaıyndaldy. Sottalýshy I. qylmysty habarlamaý (QR QK 434-baby) boıynsha kinásiz dep tanylyp, qylmystyq quqyq buzýshylyqtyń jasalmaǵany sebepti aqtaldy. Ol sot zalynan bosatyldy, — dep habarlady qalalyq sot.
Sot úkimi zańdy kúshine engen joq.
Eske salaıyq, jyl basynan beri Almatyda kólikti mas kúıinde basqarǵan 1,5 myń adam jazalandy.