Almatyda Esentaı ózeniniń jaǵalaýynda serýendeý aımaǵy paıda bolady
Almaty qalasy Jetisý aýdanynda kúrdeli jóndeý aıasynda Esentaı ózeniniń jaǵasynda, Chernovıtskaıa kóshesiniń boıynda Samyrsyn kóshesine deıin jaǵalaý salý jumystary bastaldy. Jaǵalaýdyń jalpy uzyndyǵy - 1200 metr.
Rekonstrýktsııalaý aıasynda ózen arnasyn tazartý júrgiziledi, sondaı-aq serýendeý aımaǵy qurylady. Jańa qoǵamdyq keńistikte 3700 sharshy metr tósenish tóseý, 230 sharshy metr turaq ornatý, sondaı-aq 6850 sharshy metr jerdi kógaldandyrý josparda. Sondaı-aq uzyndyǵy 1,2 shaqyrym bolatyn 120 jaryqtandyrý tiregi ornatylady. Kelýshilerdiń jaılylyǵy úshin 50 oryndyq pen qoqys jáshigi qoıylmaq. Osylaısha 2 yńǵaıly sanıtarlyq torap ornatylady.
Balalar men sport alańdary bar jańa qoǵamdyq keńistik qurý, skeıt alańyn, jaıaý júrginshiler joldaryn jáne ózen jaǵasynda demalý múmkindigi bar alańdy jaılastyrý jobanyń mańyzdy bóligi. Átkenshek, syrǵanaq jáne órmeleý sııaqty ashyq oıyn elementteri balanyń motorıkasy men fızıkalyq belsendiligin arttyrady.
Kópir ótkelderin qaıta qurý jaıaý júrginshiler men velosıpedshiler úshin qaýipsizdik pen qoljetimdilikti qamtamasyz etýge baǵyttalǵan. Trotýarlar men velosıped joldaryn ornatý qarastyrylǵan, avtomatty sýarý da salynady.
Jańa qoǵamdyq keńistik ózen jaǵasyn qala aýmaǵyndaǵy biregeı tabıǵı saıabaqqa aınaldyrady. Qurylys jumystaryn 2024 jyldyń ekinshi toqsanynyń sońyna deıin aıaqtaý josparlanyp otyr.
Aıta keteıik Naýryzbaı aýdanynda 7,7 shaqyrymǵa sozylyp jatqan «Qarǵaly» ózeniniń jaǵalaýy qaıta jańartylyp jatyr.
Sondaı-aq «Taza Qazaqstan» respýblıkalyq jáne «Almaty – bizdiń ortaq úıimiz» qalalyq naýqany aıasynda megapolıste 4 myńnan astam jemis aǵashy otyrǵyzyldy.
Esterińizge sala keteıik, 8 sáýir men 8 mamyr aralyǵynda Almatyda «Almaty – bizdiń ortaq úıimiz» naýqany ótip jatyr. Árbir turǵyn qalanyń damýy men abattandyrylýyna óz úlesin qosa alady.