Almatyda er adamnyń kóz almasyna temir kirip ketti

<p>ALMATY. KAZINFORM - Almatylyq kóz dárigerleri jas jigittiń kózine kirgen metall synyǵyn alyp tastap, kózdiń kórý qabiletin saqtap qaldy.</p>

Ortalyq qalalyq klınıkalyq aýrýhananyń qabyldaý bólimine kóz almasynyń jaraqatymen túsken naýqastyń aıtýynsha, jıhazǵa arnalǵan qurylǵynyń temiri kózine úı jaǵdaıynda kirip ketken.

Oftolmologııa bólimshesiniń meńgerýshisi Gúlzat Abdraımova, mundaı jaraqat kóz almasynyń jyrtylýyna, kóz lınzasynyń yǵysýyna, katarakta, glaýkoma, kózdiń shyny tárizdes qabatyna qan jınalýy nemese tordyń zaqymdalýyna ákelýi múmkin.

Dárigerler kózdiń ishindegi bógde zatty shyǵaryp alý úshin operatsııa jasady.

«Ota sátti ótti, otadan keıin naýqastyń kórý qabileti tolyqtaı saqtaldy. Kózge kirgen artyq zatty alyp tastaǵan soń, biz naýqas kóziniń torly qabatyna lazerlik koagýlıatsııa jasadyq. Sebebi, otadan keıin naýqasta kózdiń kórý qabileti tómendep ketý qaýpi boldy», - deıdi dáriger.

Ortalyq qalalyq klınıkalyq aýrýhanada mundaı otany jasaý úshin zamanaýı qurylǵylar bar, olar túrli dárejedegi kóz aýrýyn emdeýde ozyq nátıjelerge jetýge múmkindik beredi.

«Kóp jaǵdaıda alyp tastaýdy qajet etetin zattar kózge aýyl sharýashylyǵy, qurylys jumystary, aǵashpen jumys isteý kezinde kiredi. Sol sebepten de men jumys isteý barysynda qaýipsizdik erejelerin saqtap, qorǵanysh kózildirigin kııýdi usynamyn», - dedi oftolmolog.