Almatyda er adam balasynyń synyptasyn tunshyqtyryp, urǵan

<p>ALMATY. KAZINFORM &mdash; Áleýmettik jelide belgisiz er adam mektepke kirip, synypta otyrǵan bireýdiń kishkentaı balasyn uryp-soqqany týraly aqparat paıda boldy. Osyǵan qatysty Almaty polıtsııasy men Balalardyń quqyqtaryn qorǵaý komıteti pikir bildirdi.</p>

Bul týraly taıaq jegen balanyń anasy óziniń Instagram –daǵy paraqshasynda jazdy.

Aıtýynsha, ulyn synyptasynyń ákesi uryp-soǵyp, tunshyqtyrǵan.

«Bul mektepte úzilis kezinde boldy. Synyp jetekshisi joq kezde synypqa kirip, qylqyndyryp, uryp-soǵa bastaǵan», - delingen jazbada.

Almaty Polıtsııa departamentiniń málimetinshe, keleńsiz jaǵdaı 2 aqpanda bolǵan.

«Bul faktini jergilikti polıtsııa qyzmetiniń, sondaı-aq ıývenaldy polıtsııa qyzmetkerleri tirkep, nazarǵa aldy. Qazirgi ýaqytta istiń mán-jaıyn anyqtaý boıynsha tekserý sharalary júrgizilýde, onyń qorytyndysy boıynsha sheshim qabyldanady», - dep habarlady vedomstvodan.

Oqý-aǵartý mınıstrligi Balalardyń quqyǵyn qorǵaý komıteti de Almatyda bolǵan jaǵdaıǵa baılanysty túsinik berdi.

«Aýdandyq bilim bóliminiń aqparyna sáıkes dırektordyń orynbasaryna, synyp jetekshisine, kúzetshige qatysty tıisti tártiptik sharalar qabyldanǵanyn habarlaımyz. Atalǵan másele Balalardyń quqyqtaryn qorǵaý komıteti men Bala quqyqtary jónindegi óńirlik ýákildiń baqylaýynda. Búginde tergeý amaldary júrgizilýde»,- delingen habarlamada.