Almatyda endi úıden shyǵatyn qoqystardy beıbereket tastaı beretinder jaýapqa tartylady
Almaty ákimdiginiń málimetinshe, qoqystardyń qatarynda kólemdi zattar – mýltıpisirgish, kástról, avtokólikterdiń tozǵan dóńgelekteri tabyldy. Olar jańbyr sýynyń bitelýine ákelip, nátıjesinde úlken sý basý ýchaskeleri paıda bolǵan. Sondaı-aq, aryqtar men kanaldarda jaıalyqtar men turmystyq qaldyqtar da tabylyp jatyr. Odan bólek qala aýdandarynyń birinde avtokólikterdiń ótýi úshin gazobloktar qoıylǵan aryq tabyldy.
Aıtý kerek, nóser jaýyn bastalǵanǵa deıin barlyq aryq jelileri aldyn-ala tazartylǵan bolatyn.
«Qala turǵyndarynan sý basýdyń aldyn alý úshin aryqtarǵa, kanaldarǵa qoqys pen turmystyq qaldyqtardy tastamaýdy suraımyz. Turmystyq qaldyqpen birge tastalǵan basqa da zattar (synǵan termometrler, merzimi ótken dári-dármekter, dezodoranttar, aýa tazartqyshtar, aerozolder, elektrondy qurylǵylar, turmystyq tehnıka, flýorestsentti shamdar, dóńgelekter, basqa da rezeńkeli buıymdar, jıhaz, ydys-aıaq jáne t.b.) qorshaǵan ortaǵa qaýip tóndiretinin este ustaǵan jón. Mundaı jaǵdaılar anyqtalǵan jaǵdaıda buzýshylar ÁQBtK-niń 505-baby «Qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq ınfraqurylym obektilerin buzý, qala men eldi mekenderdiń jasyl jelekterin joıý jáne zaqymdaý» boıynsha ákimshilik jaýapqa tartylatyn bolady», - dep eskertti Almaty ákimdiginiń baspasóz qyzmeti.
Qazirgi ýaqytta Almaty qalasynyń kóshelerinde tazalyq pen jol qozǵalysynyń qatysýshylaryna jaıly júrip-turýdy qamtamasyz etý úshin 1000-nan astam jol jumysshysy men 500 arnaıy tehnıka jumys istep jatyr. Kún saıyn kommýnaldyq qyzmetterdiń kúshimen júzdegen tonna qoqys pen turmystyq qaldyqtar shyǵarylady. Osyǵan baılanysty ákimdik qala turǵyndary men qonaqtarynan qorshaǵan ortaǵa uqypty qaraýdy, kommýnaldyq qyzmetkerlerdiń eńbegin qurmetteýge shaqyrdy.
Eske salaıyq, Almatyda qolaısyz aýa raıy saldarynan qutqarýshylar men kommýnaldyq qyzmetter kúsheıtilgen qyzmetke kóshkenin habarlaǵanbyz.
Sondaı-aq Almaty ákimdigi qolaısyz aýa raıynan kelgen zaqym mólsherin jarııalaǵan bolatyn.