Almatyda eko kólikke suranys joǵary – ýrbanıst
Ýrbanıst Almatyda sońǵy jyldary velokólik úshin ınfraqurylymdy qurýǵa kóp kóńil bólinip jatqanyn atap ótti.
«Qalalyq mobıldilik basqarmasynyń málimetinshe, qazir 92 shaqyrym velo-ınfraqurylym jabdyqtalǵan. Velojolaqtardyń uzyndyǵy – 25 km. Al velojoldar 67 shaqyrymǵa jýyq. Jibek joly dańǵyly, Ótepov, Toraıǵyrov jáne Kekilbaıuly kóshelerinde oqshaýlanǵan velojoldar bar ekenin atap ótken jón. Sebebi qazir yńǵaıly zamanaýı elektr samokattar keńinen qoldanylyp keledi. Samokat júrgizýshileri velojoldar men velojolaqtardy belsendi qoldanyp júr», - deıdi ol.
Ashat Sadýovtyń aıtýynsha, elektrosamokattar – birshama jas kólik túri. Samokattar keıingi birneshe jylda yńǵaılyǵy jáne ekologııalyq tazalyǵy arqyly tanymal boldy.
«Ádette, barlyq jańa nárselerge úırenip, mashyqtaný úshin ýaqyt qajet. Iá, bastapqyda samokatqa qatysty jaıaý júrginshilerdiń kózqarasy teris boldy. Al samokat júrgizýshileriniń ózderi úshin de bári jańa boldy, qatelikter, jaraqattar oryn alyp jatty. Birneshe jyldan keıin biz kóliktiń bul túri ýaqytty baǵalaıtyn, mobıldilikti jaqsy kóretin almatylyqtardyń kúndelikti ómirine qalaı úılesimdi engenin baıqaımyz. Statıstıka da oń dınamıkany rastaıdy. Bir sózben aıtqanda, mıkromobıldilik mádenıeti damyp keledi», - dedi Ashat Sadýov.
Sarapshy mıkromobıldi kólikti paıdalanýdyń negizgi artyqshylyqtary ataldy.
«Samokattar iri qalalardaǵy kóliktik problemalardy jeńildetýi múmkin. Óıtkeni olar adamdarǵa qysqa qashyqtyqqa ońaı júrýge múmkindik beredi. Bul qoǵamdyq kólikterdegi júktemeni jáne joldardaǵy kólikterdiń sanyn azaıtýǵa kómektesedi. Sondaı-aq samokatpen júrý adamdarǵa belsendi ómir saltyn saqtaýǵa kómektesedi jáne aýany paıdalanylǵan gazdarmen lastamaıdy», - deıdi ol.
Spıker, samokat júrgizýshileri kólik ıeleri sııaqty joldarda jaýapty bolýy kerek ekenin tilge tıek etti.
«Samokattyń maksımaldy tıimdiligi úshin samokat júrgizýshileri úshin de, avtokólik ıeleri úshin de jol qaýipsizdigin qamtamasyz etý, qajetti ınfraqurylymdy damytý, sondaı-aq olardy zańnamaǵa sáıkes paıdalanýdy retteý mańyzdy ekenin eskerý qajet. Samokat júrgizýshileri kólik ıeleri sııaqty joldarda jaýapty bolýy kerek dep sanaımyn», - dep túıindedi Ashat Sadýov.
Almatyda kıksherıngtik samokattar sany shamamen 17 myń. Byltyr olarmen 14 mıllıonnan astam sapar jasaldy.
Bul 2022 jylmen salystyrǵanda eki ese kóp.
Aıta keteıik, búgin Májilis mopedke jáne velosıpedke qatysty jańa talaptardy qamtyǵan zańdy qabyldady.