Almatyda ekinshi deńgeıli bankterge 9 mln teńgeden astam aıyppul salyndy

<p>Almatyda bankterdiń bólimshelerinde múmkindigi shekteýli adamdar úshin qajetti jaǵdaı jasalmaǵan. Bul týraly qalanyń Medeý aýdanynyń prokýratýrasy taldaý barysynda anyqtady, dep habarlaıdy <a href="Kazinform" target="_blank" rel="noopener">Kazinform</a>.</p>

Almaty qalalyq prokýratýranyń málimetinshe, prokýrorlarmen kezdesý barysynda múgedekter qoǵamynyń ókilderi qaladaǵy ekinshi deńgeıli bankterdiń (EDB) bólimshelerine qoljetimdiliktiń joqtyǵy týraly másele kóterdi.

EDB múgedektigi bar adamdar qarjylyq qyzmet alýǵa jıi keletin oryndardyń biri bolyp tabylady. Prokýrorlar qaladaǵy bankterdiń birde-bir bólimshesi qoıylǵan talaptarǵa sáıkes emestigin anyqtady, ıaǵnı pandýstar, mnemoshemalar, arnaıy kassalar jáne t.b. ne talapqa saı emes nemese múlde joq dese bolady. Al qalada múmkindigi shekteýli 50 myńnan astam adam turady.

«Qazaqstan Respýblıkasynda múgedekterdi áleýmettik qorǵaý týraly» QR zańynyń 14-babyna sáıkes Qazaqstan Respýblıkasyndaǵy múgedekter Qazaqstan Respýblıkasynyń Konstıtýtsııasymen, Qazaqstan Respýblıkasynyń basqa da zańnamalyq aktilerimen bekitilgen, áleýmettik ınfraqurylym obektilerine qol jetkizýdi qamtamasyz etý quqyǵyn qosa alǵanda, barlyq áleýmettik-ekonomıkalyq jáne jeke quqyqtary men bostandyqtaryna ıe. Osyǵan baılanysty, Qazaqstan Respýblıkasynyń múgedektigi bar adamdardy áleýmettik qorǵaý týraly zańnamasyn buzǵany úshin Almaty qalasy Eńbek jáne áleýmettik qorǵaý komıtetiniń departamentimen 13 EDB «Ákimshilik quqyq buzýshylyq týraly» QR Kodeksiniń 83-baby boıynsha 9 mln teńgeden astam somaǵa ákimshilik jaýapqa tartyldy", - dep habarlady qalalyq prokýratýrasynyń baspasóz qyzmeti.

Ýákiletti organ barlyq bankterge buzýshylyqtardy joıý jáne múgedektigi bar adamdar úshin kózdelgen jaǵdaılardy jasaý qajettigi týraly uıǵarymdar berdi.

Prokýratýrada sondaı-aq qazirgi ýaqytta 8 bank óz bólimshelerin talapqa sáıkestendirip úlgergenin, qalǵandary tıisti sharalar qabyldap jatqanyn habarlady.