Almatyda eki baǵyt boıynsha avtobýstar jańardy

<p>ALMATY. KAZINFORM &ndash; Almatyda №52 jáne №24 baǵyttar boıynsha avtobýstar jańaryp, jyljymaly birlik sany artty.&nbsp;</p>

Megapolıste №52 baǵyttaǵy ortasha dızeldi avtobýstardy syıymdylyǵy joǵary gazben júretin avtobýstar almastyrdy. Sonymen qatar qoǵamdyq kóliktegi jolaýshylar tasymalyna josparly shyǵýy jumys kúnderi 16-dan 25 birlikke deıin, demalys kúnderi 14-ten 20 birlikke deıin ulǵaıtyldy. Sonyń nátıjesinde josparly aralyq jumys kúnderi 11-den 9 mınýtqa deıin jáne demalys kúnderi 14-ten 11 mınýtqa deıin qysqardy.

«Sondaı-aq qala turǵyndarynyń ótinishi boıynsha №24 marshrýtqa «Yutong» markaly syıymdylyǵy joǵary avtobýstar shyǵaryldy. «Ójet shaǵyn aýdany - Soltústik» – «Ekobeket» qatynasyndaǵy marshrýttaǵy jyljymaly quramnyń sany 12 birlik, josparly qozǵalys aralyǵy 15 mınýt», - dep habarlady qalalyq ákimdikten.

Buǵan deıin «Asyl arman» shaǵyn aýdanyna baratyn avtobýstardyń jańarǵany týraly jazǵan edik. 

Esterińizge sala keteıik, byltyr megapolıs basshysy Erbolat Dosaevtyń tapsyrmasymen ákimdik 600 avtobýs pen 100 trolleıbýs satyp alyp, 22 jańa marshrýt, onyń ishinde 10 qala mańyndaǵy baǵyt uıymdastyryp, 50-ge jýyq eldi mekendi qamtydy.

Bıyl taǵy 600 avtobýs, 100 trolleıbýs jáne elektr qýatymen júretin 100 avtobýs satyp alý josparda.