Almatyda «Dombyra Party Kóktóbede» merekelik sharasy ótip jatyr
Merekelik is-shara aıasynda qala turǵyndary men qonaqtary halqymyzdyń baı mýzykalyq ónerimen jaqyn tanysýǵa, dombyra aspabynan tógiletin ulttyq áýenniń sheberlikpen oryndalýyn tamashalaýǵa biregeı múmkindik aldy. Aıta keteıik, Ulttyq dombyra kúni jyl saıyn elimizde shilde aıynyń alǵashqy jeksenbisinde atap ótiledi.
– Іs-shara Qurmanǵazy atyndaǵy Qazaq ulttyq halyq aspaptar orkestriniń 90 jyldyq mereıtoıyna jáne Ulttyq dombyra kúnine arnalady. Maqsatymyz - halyqqa dombyrany nasıhattaý. Dombyra kúni resmı túrde 2018 jyldan beri 6-jyl toılanyp otyr. Búgin merekelik sharany Almatynyń sımvoly sanalatyn Kóktóbeniń tórinde uıymdastyrdyq. Ulttyq orkestr oryndaýyndaǵy ártúrli keremet kúıler, jaqsy ánder halyqtyń nazaryna usynyldy, - dedi Qurmanǵazy atyndaǵy Qazaq ulttyq halyq aspaptar orkestri dırektorynyń shyǵarmashylyq jónindegi orynbasary Altynbek Qoıanbekuly.
Kontsert barysynda qudiretti kúı ónerinen kúı shashý jáne qazirgi zaman kompozıtorlarynyń shyǵarmalary, sondaı-aq ulttyq áýender oryndalýda. Sondaı-aq mádenı sharada elimizdegi dombyra jasaý sheberi Jolaýshy Turdyǵulovtyń dombyrasy kórermen arasynda oınatylady.
– Men dombyrany 9 jasymnan beri oınap kelemin. Kásibı túrde úırený úshin mýzykalyq kolledj jáne konservatorııany, sondaı-aq magıstratýrany bitirdim. Qazir dombyrada júrgenime 16-17 jyldaı bolyp qaldy. Ákem konservatorııa professory, atam kúıshi bolǵan, sondyqtan osy jolmen mende kele jatyrmyn. Dombyranyń ereksheligine kelsek, aspap eki shekti bolǵanymen, gıtaraǵa qaraǵanda úırený ońaı jáne dybysy erekshe dep aıta alamyn, - dedi Qurmanǵazy atyndaǵy Qazaq ulttyq halyq aspaptar orkestriniń ártisi Baqyt Beksultan.
Tájirıbeli dombyrashy Qazaqstannyń ár óńirinde ózine tán dombyra mektebi bar ekenin atap ótti.
– Batys kúıshilik mektebi kóbine Qurmanǵazy, Dáýletkereıdiń, al Aral, Aqtóbe jaqta Qazanǵaptyń kúıshilik mektebi qalyptasqan. Olardyń oryndaýy – tókpe kúıler. Al Qaraǵandy, Jezqazǵannyń aımaǵy shertpe kúıge jaqyn. Óıtkeni bul Táttimbet Qazanǵapulynyń týyp-ósken jeri. Qaraǵandy kolledjine Táttimbettiń aty berilýi beker emes. Shertpe kúıler Ortalyq Qazaqstanǵa, tókpe kúıler Batys Qazaqstanǵa jatady, - dedi Baqyt Beksultan.