Elimizde qar kóshkini jańa ádispen túsiriledi
Mınıstr fılıaldyń qyzmetimen tanysyp, birqatar obektini, sonyń ishinde ortalyq dıspetcherlik pýnkt pen avtomobıl jáne arnaıy tehnıkanyń jaı-kúıin tekserdi.
Mınıstrliktiń baspasóz qyzmeti habarlaǵandaı, sapar barysynda vedomstvo basshysy Qazseldenqorǵaý qyzmetkerlerimen birlesip kóshkin jaǵdaıyna monıtorıng júrgizý jáne baǵalaý úshin aerovızýaldy barlaý júrgizdi. Qar kóshkininiń aldyn alý úshin ornatylǵan jańa jabdyqqa erekshe nazar aýdaryldy.
Shyńǵys Árinovke «DaisyBell» mobıldi qar kóshkinine qarsy júıesi tanystyrylyp, synaqtan ótti.
Bul qondyrǵy – tikushaqqa kabel arqyly bekitilgen metall konýs. Qurylǵynyń jumys prıntsıpi konýstaǵy azot-sýtegi qospasynyń buzylýyn qashyqtan bastaý bolyp sanalady. Bul qar kóshkininiń tıimdi túsýine yqpal etip, asa aýyr saldardyń aldyn alýǵa múmkindik beredi. «DaisyBell» qar kóshkinine qarsy júıesi Eýropa elderinde, sonyń ishinde Reseıde sátti qoldanylyp keledi jáne jergilikti klımattyq jaǵdaılarda onyń jumysyn baǵalaý úshin Qazaqstanda synaqtan ótip jatyr.
«Qazavıaqutqarý» AQ tikushaǵymen aerovızýaldy barlaý sheńberinde júıe Úlken jáne Kishi Almaty ózenderi basseınderiniń kóshkin qaýpi bar ýchaskelerinde qar kóshkininiń profılaktıkalyq túsýimen synaqtan ótti. Mınıstr kóshkin qaýpi kezeńinde profılaktıkalyq jumystarda jańa tehnologııalardy qoldaný qajettigin atap ótip, tıisti tapsyrma berdi.
Qar kóshkini – adamdardyń ómirine qaýip tóndiretin Qazaqstandaǵy asa qaýipti tabıǵı qubylystardyń biri. Qar kóshkini qaýpi bar kezeń qarashadan mamyrǵa deıin sozylady. Al bıik taýly aımaqtarda qar kóshkini jyl boıy júrýi múmkin.
Elimizde kóshkin qaýpi bar 619 ýchaske bar, onyń 165-i Almaty qalasynda ornalasqan. Sońǵy jyldary qysqy demalys túrleriniń tanymaldylyǵy artqannan keıin adamdardyń ómirine qaýip aıtarlyqtaı ósti.
Qar kóshkininiń aldyn alý úshin Qazseldenqorǵaý jyl saıyn 150-ge deıin profılaktıkalyq túsirý júrgizedi. Qardyń kólemi 250 myń tekshe metrge jetýi múmkin. 2024-2025 jyldardaǵy qysqy maýsymda jalpy kólemi shamamen 6665 m3 qar bolatyn 15 profılaktıkalyq túsirý júrgizildi.
«Qazgıdromet» RMK boljamy boıynsha 2025 jyldyń qańtar jáne aqpan aılarynda taýly aýmaqtyń basym bóliginde joǵary temperatýra men mol jaýyn-shashyn bolady. Bul qar jamylǵysynyń turaqsyz jaǵdaıyna alyp keledi jáne kóshkin qaýpi bar oqıǵalardyń yqtımaldyǵyn arttyrady.
Almaty oblysynyń qutqarýshylary qar kóshkinine baılanysty eskertý jasaǵanyn jazǵan bolatynbyz.