Almatyda burynǵy áıelin urǵan er adamǵa qatysty sot úkimi shyqty

<p>ALMATY. KAZINFORM &ndash; Almatyda burynǵy azamattyq nekedegi áıelin sabaǵan er adam jazalandy.</p>

Almaty qalasynyń Naýryzbaı aýdandyq sotynda áıelge judyryq jumsaǵan aıyptalýshy M-ǵa qatysty qylmystyq is qaraldy. Sot anyqtaǵandaı, sottalýshy buryn birge turǵan áıeldi úıdiń kireberisinde birneshe ret uryp, densaýlyǵyna jeńil zııan keltirgen. Sottalýshynyń kinási jábirlenýshiniń aıǵaqtarymen jáne qylmystyq istiń basqa materıaldarymen dáleldendi.

«Sottalýshy kinásin moıyndap, jasaǵan isine ókinetinin jetkizdi. Jábirlenýshi de sottalýshyny keshirdi jáne bas bostandyǵynan aıyrmaýdy ótindi», - dep atap ótti vedomstvodan.

Al prokýror sottalýshynyń bas bostandyǵyn 1 jylǵa shekteýdi surady.

«Sot jaza taǵaıyndaý kezinde QK-niń 55-babynyń 1-tarmaǵynyń 1-bóliginiń talaptaryn nazarǵa aldy. Kináni moıyndaý, jasaǵan isine ókiný, qylmyspen keltirilgen zııandy óz erkimen óteý jeńildetetin mán-jaılar dep tanydy. Sottalýshy buzaqylyq jasaǵany úshin kináli dep tanylyp, oǵan 1 jyl bas bostandyǵyn shekteý túrindegi jaza taǵaıyndaldy», - dep habarlady sottan.

Úkim zańdy kúshine engen joq.

Eske salaıyq, osy jyldyń mamyr aıynda áleýmettik jelilerde Almatydaǵy turǵyn úılerdiń birinde er adamnyń áıeldi aıaýsyz uryp jatqan beınejazbasy taraǵan bolatyn.

Keıin áıeldi aıaýsyz uryp-soqqan er adamnyń ústinen qylmystyq is qozǵalyp, ol ýaqytsha ustaý ızolıatoryna qamalǵan edi.