Almatyda birinshi synyp oqýshysynyń zorlanýy: saraptama qorytyndysy jarııalandy

<p>Almaty polıtsııasy jekemenshik mektepterdiń birinde 7 jasar balany zorlaý faktisine qatysty sot-medıtsınalyq komıssııa saraptamasynyń qorytyndysyn jarııalady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Almaty qalalyq Polıtsııa departamenti QR QK-niń 121-baby 4-bóligimen qarastyrylǵan qylmys baby boıynsha qylmystyq isti tergep jatyr.

«Sot-komıssııalyq saraptamasy taǵaıyndaldy. Saraptama qorytyndysy boıynsha balanyń denesinde syrtqy jáne ishki jaraqattar tabylmady. Qazir qosymsha saraptama taǵaıyndaldy. Sondaı-aq genomdyq DNQ saraptamasy júrgizildi, ol bógde bıomaterıaldyń joq ekendigin anyqtady», - dep habarlady Almaty qalalyq Polıtsııa departamentiniń baspasóz qyzmeti.

Baqylaý kameralaryna túsken beınejazbalar tergeý úshin tárkilenip, muqııat saraptamadan ótti. Alaıda qylmystyq is júrgizý zańnamasynyń, atap aıtqanda, QR QІJK-niń 201-babynyń talaptaryna sáıkes sotqa deıingi tergeý týraly málimetter jarııa etýge jatpaıdy.

Eske salaıyq, qazan aıynyń basynda Almaty turǵyny 1-synyptaǵy balasynyń zorlanǵany týraly málimdeme jasaǵan bolatyn. 

Keıin Almaty qalalyq Polıtsııa departamenti bastyǵynyń birinshi orynbasary Nurlan Almasbekov atalǵan derek Bostandyq aýdany polıtsııa basqarmasynda QR QK-niń 121-baby 3-bóligi boıynsha tirkelgenin jáne birqatar saraptama taǵaıyndalǵanyn aıtqan edi. 

Qazan aıynyń sońynda 7 jastaǵy oqýshynyń anasy taǵy bir málimdeme jasap, elimizdiń Іshki ister mınıstri men Bas prokýroryna júgindi.