Almatyda biryńǵaı týrıstik bılet iske qosyldy

<p>ALMATY. KAZINFORM &ndash; Almatyda kórikti jerler men ekskýrsııalardy tıimdi baǵamen kórýge múmkindik beretin saıahatshylar úshin Almaty Pass biryńǵaı bıleti iske qosyldy.</p>

Almaty ákimdiginiń málimetinshe, biryńǵaı bıleti alý arqyly týrıster qarjysyn 63%-ǵa deıin únemdeıdi. Mysaly, biryńǵaı bılettiń quny 9 990 teńgeden bastalady, oǵan 27 300 teńge somasyndaǵy nysandarǵa barý kiredi.

«Almaty Pass júıesine kelesi týrıstik nysandarǵa barý kiredi: «Kóktóbe» aspaly joly, «Kóktóbe» saıabaǵyndaǵy aınalma jol jáne jyldam túsý (Fast Coaster), MEGA Alma-Ata SOO aýmaǵyndaǵy Happy Eye sholý dóńgelegi, Almaty haıýanattar baǵy, Á.Qasteev atyndaǵy óner mýzeıi, «Medeý-Shymbulaq» baǵytyndaǵy Shymbulak aspaly joly, Botanıkalyq baq, sondaı-aq qalanyń qyzyqty baǵyttary boıynsha Nur Bus avtobýsymen sholý týry», - dep atap ótti ákimdikten. 

Foto: Almaty ákimdigi

Biryńǵaı bıletti almaty.citypass.kz resmı veb-saıttan satyp alýǵa bolady. Quny 9 990 teńgeden bastalady. Ári qaraı saıtta nemese mobıldi qosymshada QR kody bar vaýcher paıda bolady, ony kirerde kassaǵa kórsetý kerek. QR kod qyzmet paketine baılanysty nysanǵa birinshi kelgen sátten bastap 24 nemese 72 saǵat jaramdy.