Almatyda bloger Japonııa men Koreıaǵa vıza alyp beremin dep jurtty aldaǵan

<p>ALMATY. KAZINFORM &ndash; Almatyda Japonııa men Koreıaǵa vıza alyp berýge ýáde bergen bloger ustaldy.&nbsp; Kúdikti - Túrkistan oblysynyń týmasy. Oǵan birqatar alaıaqtyq jasady degen aıyp taǵylyp otyr.</p>

Almaty qalasy Polıtsııa departamentiniń málimetine sáıkes, áleýmettik jelilerdiń belsendi qoldanýshysy óz blogynda Japonııa men Koreıada aqsha tabýdyń joldary týraly aıtyp, qajetti qujattardy rásimdep berýge ýáde bergen. Ol óz qyzmeti úshin adamdardan 500 myńǵa deıin aqy alǵan.

Foto: Almaty qalasynyń PD

“22 jastaǵy kúdikti ustaldy. Tergeýdiń osy kezeńinde onyń ústinen 15 adam polıtsııaǵa aryz túsirgen. «Qyzmet» úshin aldyn ala tólem somasy 100-den 500 myń teńgege deıin boldy. Aldanǵan adamdar budan da kóp bolýy múmkin. Kúdiktiniń zańsyz áreketterinen zardap shekken azamattardy myna telefon nómirlerine habarlasýlaryn suraımyz: 8-707-142-01-11 jáne 8-702-777-11-40”, - dedi Medeý aýdandyq Polıtsııa basqarmasy bastyǵynyń orynbasary Tımýr Mýlınov.

Aıta keteıik, QR QK-niń 201-babyna sáıkes ózge aqparat tergeý múddesine oraı jarııa etilmeıdi.

QR Konstıtýtsııasynyń 77 baby 3-bólimi, 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.