Almatyda jyl basynan beri 83 adam aǵzasyn aýystyrdy

<p>ALMATY. KAZINFORM &ndash; Jyl basynan beri Almatyda mindetti áleýmettik medıtsınalyq saqtandyrý esebinen aǵza múshesin transplanttaý boıynsha 83 operatsııa jasaldy. Bul týraly Óńirlik kommýnıkatsııalar qyzmetinde ótken baspasóz máslıhatynda medıtsınalyq saqtandyrý qorynyń Almaty qalalyq fılıaly dırektory Іlııas Muhamedjan aıtty.</p>

Fılıal dırektorynyń aıtýynsha, mindetti medıtsınalyq saqtandyrý paketindegi medıtsınalyq qyzmet kórsetý aıasy óte keń jáne ol barlyq saqtandyrylǵan azamatqa qoljetimdi.

«Jyl basynan beri quny 551,8 mln teńgeden asatyn 83 transplantatsııa jasaldy. Mundaı bir ǵana otanyń ózi orta eseppen alǵanda 7-9 mln teńge turady. Osy qyzmetterdiń bárin saqtandyrylǵan azamattar MÁMS arqyly qıyndyqsyz paıdalanyp keledi», - deıdi Іlııas Muhamedjan.

Osyǵan deıin Almatyda qaıtys bolǵan 53 jastaǵy áıeldiń tórt adamǵa donor bolǵany týraly jazǵan edik. Onyń júregi 23 jastaǵy jas jigittiń ómiri saqtap qaldy. 

Qazir Qazaqstanda 4 000-nan astam naýqas aǵza aýystyrýǵa muqtaj. Onyń ishinde búırekke 3 661 eresek, 85 bala, baýyrǵa – 180 eresek, 10 bala, ókpege – 20 eresek, júrekke – 136 eresek, 5 bala jáne júrek-ókpe keshenine 4 eresek pen 2 bala muqtaj.