Almatyda bıyl 274 kóshede ortasha jóndeý jumystary júrgiziledi

<p>ALMATY. KAZINFORM &ndash; Qalalyq ákimdiktiń taratqan málimetine sáıkes, Almaty kóshelerindegi shuńqyrlardy jóndeýdiń 90 paıyzy 5 jyldan astam ýaqyt boıy ortasha jóndeý júrgizilmegen joldarǵa tıesili.&nbsp;</p>

Almatyda kóshe-jol jelisin jóndeý jumystary júrgizilip jatyr. Ár aýdannyń merdigerlik uıymdary monıtorıng barysynda jáne qala turǵyndarynyń túrli arnalar arqyly kelip túsken ótinishi negizinde anyqtalǵan shuńqyrlardy jóndeıdi. 

«Mysaly, Telegram arnasyndaǵy jol ınfraqurylymyna arnalǵan @AlmatyJolybot chat-botyna 23 sáýirden bastap kún saıyn 30-40 ótinim tirkeledi. Barlyǵy 400-den astam ótinish kelip tústi, onyń 70%-dan astamyna tıisti jaýap berildi. Sondaı-aq ótinimder open-almaty.kz ınternet portaly men eOtinish servısi arqyly kelip túsedi», - dep atap ótti ákimdikten. 

Jalpy, jumys bastalǵaly 41 myń sharshy metr jol tósemi jóndeýden ótti. Bul rette, jyl sońyna deıin 310 myń sharshy metr asfaltbeton jabyny bar joldardy jóndeý josparlanǵan. 

«Aıta ketý kerek, aǵymdaǵy jóndeý jol tóseminiń usaq zaqymdanýy men apattyq qazylýynyń aldyn alý jáne shuǵyl túzetý úshin júrgiziledi. Taldaý kórsetkendeı, Almatyda shuńqyrlardy jóndeýdiń shamamen 90%-y 5 jyldan astam ortasha jóndeý júrgizilmegen joldarǵa, sondaı-aq ınjenerlik jelilerdi salý jáne jóndeý júrgizilgen ýchaskelerge tıesili», - dep habarlady Almaty ákimdigi. 

Bıyl uzyndyǵy 250 shaqyrym bolatyn 274 kóshede ortasha jóndeý jumystaryn júrgizý josparda tur. 

Eske salaıyq, 2023 jyly Almatyda uzyndyǵy 200 km bolatyn 175 kóshede jol jabynyna ortasha jóndeý júrgizildi, ortasha jóndeýge kepildik merzimi 3 jyl, osy ýaqyt ishinde merdiger kez kelgen aqaýdy ózi túzetedi. 

Bul rette, byltyr pılottyq rejımde qalanyń 15 magıstraldyq kóshesinde jóndeý kezinde jolǵa jáne jaryqqa tózimdilikti arttyrýǵa baǵyttalǵan polımerasfaltobeton paıdalanyldy. 

Mundaı qospalar tozýǵa tózimdi, jumsartý temperatýrasy joǵary (65-70°C), sondyqtan ystyqqa tótep bere alady, áldeqaıda uzaǵyraq – qazirgi 5 jyldyń ornyna 8-10 jylǵa deıin paıdalanýǵa bolady. Bıyl da bul tájirıbe jalǵasady.

Buǵan deıin Úlken Almaty aınalma avtomobıl jolynda (BAKAD) tósemdegi jol belgilerin jańartý jumystary bastalǵany týraly jazǵan edik.