Almatyda beıbereket taksıster máselesi qalaı sheshiledi

<p>ALMATY. KAZINFORM &ndash; Almaty qalasynyń ákimi Erbolat Dosaev Medeý aýdanynyń turǵyndarymen kezdesý ótkizdi. Kezdesý barysynda aýdan turǵyny qaladaǵy taksısterdiń jumysyna shaǵymdandy.</p>

Turǵynnyń sózinshe, qalada ornatylǵan «Sergek» beınekameralary men turaqqa tyıym salatyn jol belgileri jolaýshy tasıtyn júrgizýshilerdiń jumysyn tıisti deńgeıde retteýge kómektespeıdi.

— Meniń suraǵym — «Halyk Arena» jaqta turatyn taksısterge baılanysty. Munda «Sergek» kamerasy men jol belgileri qoıyldy. Biraq olar buryn qalaı toqtasa, qazir de solaı toqtap júr. Bul jalpy kólik qozǵalysyna kedergi keltiredi. Sondyqtan osy aýmaqta kameralardy kóbeıtýge bola ma? — dedi turǵyn.

Erbolat Dosaev turǵyn suraǵyna jaýap bere otyryp, Almatyda taksısterge arnalǵan arnaıy turaqtar paıda bolatynyn aıtty.

— Bul máseleniń túbegeıli sheshimi — jalpy taksısterdiń jumysyn retteý. Biz Kólik mınıstrligine óz usynysymyzdy joldadyq. Ol boıynsha «Halyk Arena» mańynda ǵana emes, barlyq jerde taksıster jumysyn retteı alamyz. Sonymen qatar, Qalalyq mobıldiliń basqarmasy búkil álemde sekildi takso-turaq standarttaryn ázirledi. Meniń oıymsha, bul normany engizý máseleni sheshýge múmkindik beredi, — dedi ákim.

Eske salaıyq, buǵan deıin Almaty ákimi tez sheshilgen másele sapaly bola bermeıtinin aıtqan bolatyn.