Almatyda belgilenbegen jerde temeki shekken Qytaı azamatyna aıyppul salyndy

<p>ALMATY. KAZINFORM &ndash; Qytaı azamatyna Almaty áýejaıynda belgilenbegen jerde temeki shekkeni úshin aıyppul salyndy.</p>

Tbılısı-Almaty baǵytyndaǵy áýe reısi ushyp kelgennen keıin áýejaıdaǵy jelilik polıtsııa bóliminiń qyzmetkerleri ushaq janynda temeki shekken sheteldik jolaýshyny anyqtady. 

Buǵan Qazaqstan zańnamasymen tyıym salynǵan.

«Tekserý barysynda Qytaı Halyq Respýblıkasynyń 24 jastaǵy azamaty anyqtaldy. Quqyq buzýshy belgilenbegen oryndarda temeki buıymdaryn tutynýǵa tyıym salýdy buzǵany úshin jaýapkershilikke tartylyp, oǵan 15 AEK (55 380 teńge) mólsherinde aıyppul salyndy»,-dep habarlady kóliktegi polıtsııa departamenti.

Aıta keteıik, jyl basynan beri elimizdiń kólik polıtseıleri ártúrli ákimshilik quqyq buzýshylyqtar jasaǵany úshin 32 myńnan astam adamdy jaýapqa tartty. Onyń ishinde belgilenbegen jerlerde temeki shekkeni úshin-1021 azamat bar.