Almatydaǵy aıypturaqta myńnan asa moped tur

<p>ALMATY. KAZINFORM &ndash; Almatyda jol-kólik oqıǵalarynyń aldyn alýǵa, olardyń zardaptarynyń aýyrlyǵyn azaıtýǵa, jol qozǵalysy erejelerin buzý týraly derekterdi anyqtaý jáne jolyn kesýge baǵyttalǵan &ldquo;Quqyqtyq tártip&rdquo; jalpyrespýblıkalyq jedel aldyn alý is-sharasynyń úshinshi kezeńi júrgizilip jatyr.</p>

Qalalyq polıtsııa departamenti málimetinshe, ótken demalys kúnderi megapolıs joldarynda 2 myńǵa jýyq quqyqbuzýshylyq anyqtalǵan. Onyń basym bóligin elektrosamokat men moped paıdalanýshylary jasaǵan. Jalpy samokattar men mopedterdi paıdalaný boıynsha quqyq buzýshylyqtardy anyqtaýǵa qatysty jergilikti is-shara bastalǵannan beri 4 800 moped júrgizýshisi jáne 5 200 samokat júrgizýshisi ákimshilik jaýapkershilikke tartylǵan.

– 100-ge jýyq ata-ana balalaryna samokat pen moped júrgizýge ruqsat bergeni úshin jaýapkershilikke tartyldy. Bul jalpy zań men qaýipsizdik standarttaryna qaıshy keledi, – dedi Almaty qalalyq PD jergilikti polıtsııa qyzmeti basqarmasynyń bastyǵy Serik Shýmaev.

Onyń aıtýynsha, keń aýqymdy reıdter nátıjesinde myńnan asa moped, sondaı-aq 3 myń 625 avtokólik mamandandyrylǵan aıyppul turaǵyna ornalastyryldy.

– Jyl basynan beri samokattar men mopedterdiń qatysýymen 463 jol-kólik oqıǵasy oryn alyp, nátıjesinde 500 adam jaraqat aldy, 7 adam qaza tapty. 68 jaǵdaıda eki dóńgelekti kólikti balalar júrgizgen, – dedi Serik Shýmaev.