Almatylyq búldirshinder Aıaz Atanyń kıiz úıine bara alady

<p>ASTANA. KAZINFORM &mdash; Almatyda Aıaz Atanyń ulttyq stılde bezendirilgen merekelik kıiz úıleri paıda boldy. Bul týraly qala ákimdigi málim etti.</p>

Olar qalanyń úsh kórnekti jerinde: Astana jáne Abaı atyndaǵy alańdarda jáne Arbatta ornatylǵan.

— Aıaz Ata qonaqtardy qarsy alatyn kıiz úılerdiń esigi kelýshiler úshin kún saıyn saǵat 15:00–den 21:00–ge deıin ashyq bolady. Qala turǵyndary men qonaqtary 31 jeltoqsanǵa deıin jańa jyldyń basty keıipkerimen sýretke túsip, qýanysh pen ǵajaıyptar atmosferasyna ene alady. 31 jeltoqsanda kıiz úıler Astana alańynda tún ortasyna deıin jumys isteıtin bolady, al 2025 jyldyń bastalý sátinde munda jańa jyldyq kontsertten keıin otshashý bolady, — delingen ákimdik habarlamasynda.

Jańa jylǵa deıingi qalǵan kúnderde kıiz úılerdiń janynda túrli shyǵarmashylyq sheberhanalar, qyzyqty oıyndar, bezendirilgen sahnalarda jandy qoıylymdar jáne súıikti jańa jyldyq keıipkerlermen kezdesýler ótedi.

Sheberler men qolónershiler búkil otbasy úshin sheberlik sabaqtaryn ótkizedi, onda qonaqtar óz qoldarymen erekshe jańa jyldyq oıynshyqtar jasaı alady. Aǵash shyrsha oıynshyqtaryn bezendirý, krýjkalardy jarqyn sýrettermen jáne sándik elementtermen bezendirý, mýzykalyq qoraptar jasaý jáne jańa jyldyq taqyrypta gıps fıgýralaryn jandandyrý múmkin bolady. Bul sabaqtar barlyǵyna ózderin naǵyz sheber retinde sezinýge jáne merekeniń bir bóligin ózderimen birge alyp ketýge múmkindik beredi.

Eske salsaq, osyǵan deıin Almatyda qoǵamdyq kólikter merekege saı bezendirilgenin jazdyq.