Almatyda aıaǵy jaraqattanǵan fýtbolshyǵa kúrdeli ota sátti jasaldy

<p>ALMATY. KAZINFORM &ndash; Almatylyq travmatologtar kúrdeli aıaq jaraqaty bar sportshyny aıaǵyna turǵyzdy.</p>

Jas sportshy jaraqatymen Ortalyq qalalyq klınıkalyq aýrýhanaǵa túsken. Alǵan jaraqaty sportshynyń kúndelikti belsendi ómiri men sporttyq mansabyna úlken qaýip tóndirgen.

Dárigerlerdiń sózinshe, aldyńǵy krest tárizdi baılamnyń plastıkalyq otasy — tize býynynyń turaqtylyǵyn qalpyna keltirýge jáne yqtımal asqynýdyń aldyn alýǵa baǵyttalǵan kúrdeli ári jaýapty hırýrgııalyq aralasý bolyp tabylady.

«Aldyńǵy krest tárizdi baılamnyń erekshe qurylymy bar, ol jyrtylǵan soń býynnyń fýnktsıonaldyǵyn qalpyna keltirý úshin transplantatty aýystyrýdy qajet etedi. Bul ary qaraı qıyndyq pen qaıta jaraqat alý qaýpiniń joǵarylaýyn boldyrmas úshin baılamnyń ishinara zaqymdanýy kezinde de mańyzdy. Transplantatsııa retinde biz jartylaı sińir bulshyqetiniń sińirin qoldandyq, ony syrtqy tobyq proektsııasyn kishkene kesý arqyly shyǵardyq. Biz otanyń sátti ótkenine qýanyshtymyz. Naýqas ońaltý kýrsynan ótti», — deıdi sportshynyń emdelý jáne qalpyna keltirý kezeńin muqııat baqylaǵan dáriger Nurjan Nuraly.

Búgingi kúni sportshy jattyǵýlaryn bastaýǵa daıyn, ásirese ómiriniń bir bólshegine aınalǵan fýtboldan jattyǵýyn qaıta bastamaq.

«Mundaı jaraqattan soń ózimniń súıikti isime qaıta orala almaspyn dep oılaǵan edim. Shúkir, aýrýhanada óz isiniń naǵyz mamandary jumys isteıdi. Dárigerlerge rahmet, olardyń kásibıliginiń arqasynda men taǵy da qozǵalystyń qýanyshyn, óz qabiletime degen senimdilikti jáne jańa sporttyq jetistikterge daıyn ekenimdi sezine alamyn», — dedi OQKA-nyń emdelýshisi.