Almatyda áskerı-tehnıkalyq mekteptiń kýrsanttary áskerı ant berdi
Saltanatty ant qabyldaý rásiminen keıin áskerı-tehnıkalyq mekteptiń Almatydaǵy fılıalynyń júz alpys kýrsantyna sertıfıkattar tabys etildi. Sonyń negizinde Egov saıtyndaǵy olardyń jeke kabınetinde áskerı bılettiń elektrondyq nusqasy paıda bolady.
Áskerı-tehnıkalyq mektep fılıalynyń túlekteri tyldyq jáne tehnıkalyq qamtamasyz etý beıini boıynsha 40 kúndik áskerı daıyndyq baǵdarlamasynan ótti. Eger bıyl fılıal áskerı tehnıkaǵa qyzmet kórsetýge jáne jóndeýge, dalada tamaqtandyrýdy, zattaı qamtamasyz etýdi jáne monsha-kir jýý qyzmetin uıymdastyrýǵa baılanysty on bir mamandyq boıynsha daıarlanǵan bolsa, bolashaqta olardyń sany áskerı, sonymen qosa azamattyq salada da 22-ge deıin artatyn bolady.
– Áskerı-tehnıkalyq mektepte oqý – azamattardy áskerı daıarlaýdyń alternatıvti nusqasy. Ár túrli sebeptermen on segiz jasynda merzimdi áskerı boryshyn óteýge shaqyrylmaǵan 24-27 jas aralyǵyndaǵy jastardyń oqýǵa jáne áskerı bılet alýǵa múmkindigi bar, – dep atap ótti «QR Qorǵanys mınıstrliginiń áskerı-tehnıkalyq mektebi» RMQK Almaty fılıalynyń dırektory zapastaǵy polkovnık Mıras Jylgeldın.
Qazaqstan Prezıdentiniń jastardy jumyspen qamtý týraly tapsyrmasy osylaısha iske asyrylýda. Áskerı-tehnıkalyq mektepte oqyǵannan keıin jastar kúshtik qurylymdarǵa qyzmetke ornalasýǵa nemese azamattyq sektordaǵy kompanııalar men uıymdarǵa jumysqa ornalasýǵa múmkindik alady.
– Áskerı-tehnıkalyq mekteptiń oqytýshylar quramyna osyndaı oqý kýrsyn uıymdastyrýda kórsetken kásibı sheberlikteri men biliktilikteri úshin zor alǵysymdy bildirgim keledi. Munda men pýlemetshi retinde áskerı esep mamandyǵyn aldym. Aldaǵy ýaqytta aldyma áskerı qyzmetshi bolam dep maqsat qoıyp otyrmyn, – dedi kýrsant Erasyl Jubandyqov.
Jergilikti áskerı basqarý organdarynyń ókilderi jylyna jeti ret áskerı-tehnıkalyq mektepterge kýrsanttar irikteýdi júzege asyratynyn aıta ketken jón. Jyl saıyn bul mekteptiń Almaty fılıaly 700-den asa adamdy oqytyp shyǵarady.