Almatyda almanyń sırek túrin zertteý jáne saqtaýmen aınalysatyn ortalyq quryldy

<p>ALMATY. KAZINFORM &ndash; Almatyda Botanıka jáne fıtoıntrodýktsııa ınstıtýty janynan Sıvers alma aǵashyn zertteý jáne saqtaý ortalyǵy quryldy. Bul týraly megapolıstiń Bas botanıkalyq baǵy habarlady.&nbsp;</p>

Botanıkalyq baqtyń málimetine sáıkes, Sıvers alma aǵashy – Ortalyq Azııa men Qazaqstandaǵy taý etegindegi alma aǵashtarynyń jabaıy jemisti túri. Alma aǵashynyń bul túriniń alǵashqy sıpattamasy (1793) botanık Iogann Sıverske tıesili. DNQ zertteýlerine sáıkes, Sıvers alma aǵashy alma aǵashtarynyń kóptegen mádenı sortynyń atasy ekeni dáleldengen. Sondyqtan Qazaqstan – almanyń otany dep tanyldy.

– Botanıka jáne fıtoıntrodýktsııa ınstıtýtynyń Bas botanıkalyq baǵynyń aýmaǵynda taý jemisti ormandarynyń tabıǵı popýlıatsııalarynan iriktelip alynǵan 170-ten astam pishindi kórsetetin Sıvers alma aǵashynyń biregeı gendik qory saqtalǵan. Sıvers alma aǵashy Qazaqstannyń Qyzyl kitabyna (2014) engen jáne Halyqaralyq tabıǵatty qorǵaý odaǵynyń qorǵaýynda. Botanıka jáne fıtoıntrodýktsııa ınstıtýtynda Sıvers alma aǵashyn zerttep, saqtaýmen birneshe zerthana aınalysady. Onyń ishinde akademık Aımaq Janǵalıev qurǵan A.D.Janǵalıev atyndaǵy jemis ósimdikteriniń genofondyn qorǵaý jáne ıntrodýktsııalaý jónindegi mamandandyrylǵan zerthanasy bar, - dep habarlady botanıkalyq baqtyń baspasóz qyzmeti.

Eske salaıyq, buǵan deıin Almatyda bir aı boıy zeınetkerler Botanıkalyq baqqa tegin kire alatynyn jazǵanbyz.