Almatyda «Álııa, Mánshúk» alańyndaǵy skver qaıta jóndeledi

<p>ALMATY. KAZINFORM — Almaly aýdanynyń turǵyndarymen kezdesý kezinde Almaty ákimi Erbolat Dosaev «Álııa, Mánshúk» alańyndaǵy skverdi jóndeýge qatysty qala turǵynynyń suraǵyna jaýap berdi.</p>

Qala turǵyny «Álııa men Mánshúk» alańyndaǵy skverdi qaıta jóndeý jumystary júrgizilýin kútip júrgenin aıtty.

«Meni saıabaqtyń joǵarǵy bóliginde Panfılov kóshesine jaqta «Aqqý» dámhanasyn qalpyna keltirý jumystary josparlanǵan jeke ýchaskeniń máselesi de qyzyqtyrady. Bul jumys qalaı júrgiziledi, onda Qyzyl kitapqa engen 100 jyldyq emen bar. Munyń bárin baqylaý kerek. Sırek kezdesetin aǵashtardy saqtaý kerek, sondaı-aq shyrshalardy durystap qaıta otyrǵyzý kerek», - dedi qala turǵyny.

Erbolat Dosaev ótken jyly skverdi jóndeýge qarjyny bólingenin, alaıda, merdiger «Shah» qurylys kompanııasy osy joba men kelesi jyly abattandyrý men kógaldandyrýǵa qatysty taǵy eki joba boıynsha senimdi aqtamaǵanyn aıtty.

«Biz sotta jeńdik. Aqpan aıynda ekologııa basqarmasy jańa baıqaý ótkizedi. Bıyl jumysty bitiremiz dep úmittenemiz. Ókinishke qaraı 2023 jyly jóndeýge bólingen qarjyny 2024 jylǵa aýystyrýǵa májbúr boldyq. Buryn maquldanǵan jáne kelisilgen joba sol kúıinde qalady. «Aqqý» dámhanasyna kelsek, ol tarıhı kelbetin saqtaıdy. Biz sýburqaqty, sonymen birge aǵash otyrǵyzýdy saqtadyq. 2023 jyldyń sońynda qajetti jabdyqty satyp aldyq. Almaly aýdanynyń Jasyl komıssııasymen birge ári qaraı ne isteý kerektigin oılastyraıyq. Jobanyń skvermen ózara úndesýin qamtamasyz etemiz», - dedi Almaty ákimi Erbolat Dosaev.

Eske salsaq, Erbolat Dosaev ótken jyldyń sońyna deıin Álııa Moldaǵulova men Mánshúk Mámetova alańy jóndelip, abattandyratynyn aıtqan edi.