Almatyda AQSh-tan poshta sálemdemesi túrinde jetkizilgen esirtkiniń iri partııasy anyqtaldy

<p>ALMATY. KAZINFORM -&nbsp; Qarjylyq monıtorıng agenttigi Almatyda AQSh-tan poshta sálemdemeleri túrinde ákelingen esirtkiniń iri partııasyn áshkereledi.</p>

Jedel is-sharalardyń nátıjesinde Almaty, Petropavl, Semeı, Kókshetaý, Shymkent jáne Óskemen qalalarynda halyq tutynatyn taýarlar túrinde jasyrylǵan esirtki zattary bar («marıhýana» jáne «kannabıs syǵyndysy») AQSh-tan kelgen poshta jóneltilimderin el aýmaǵynda ótkizý maqsatynda alǵan azamattar ustaldy.

Nátıjesinde zańsyz aınalymnan shamamen 8 kg marıhýana jáne 15 kg-ǵa jýyq kannabıs syǵyndysy (gashısh maıy) tárkilendi. Qazirgi ýaqytta sotqa deıingi tergeý júrgizilip jatyr, QR on azamaty ustalyp, ÝUI-ǵa qamaýǵa alyndy.

Jedel-tergeý sharalary Bas kólik prokýratýrasyn úılestirýmen júrgizildi.

QR QPK-niń 201-baby tártibinde ózge aqparat jarııa etilmeıdi.

QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.

Jyl basynan beri agenttik esirtki aınalymy faktileri boıynsha 93 qylmystyq is tirkelgen. Zańsyz aınalymnan 52 kg esirtki tárkilendi, onyń ishinde gashısh – 8,7 kg, marıhýana – 4,8 kg. 

Sonymen qatar 1,7 kg psıhotroptyq zattar tárkilendi (pırrolıdın – 974 gr., tetragıdrokannabınol - 780,3 gr., metamfetamın-1,26 gr.), anabolıkter (ýly zat) – 206 myń dana jáne «Tropıkamıd» kóz tamshylary-1 680 dana.

Buǵan deıin jyl basynan beri zańsyz aınalymnan 578 kg esirtki tárkilengenin jazǵan bolatynbyz.