Almatyda aǵashtardy zańsyz kesý faktisi boıynsha qylmystyq is qozǵaldy
Almaty qalasynyń ekologııa jáne qorshaǵan orta basqarmasynyń málimetinshe, «Qazaq Stroy Almaty» JShS qurylys obektisinde aǵashtar zańsyz otalǵan.
«Jalpy alańy 17 gektar jer ýchaskesinde kesýge jáne qurylys júrgizýge ruqsat berilmese de mundaǵy 176 túp aǵash pen 40-tan astam jabaıy ósken butalar (barlyǵy 216 jasyl jelek kesilgen», - dep habarlady qalalyq ákimdikten.
Osyǵan baılanysty basqarma mamandandyrylǵan tabıǵat qorǵaý prokýratýrasy jáne tabıǵat qorǵaý polıtsııasynyń qyzmetkerlerimen birlesip keltirilgen zalaldy esepteıdi ári jasyl jelekterdi tekserý aktisin jasaıdy. Anyqtalǵan fakti boıynsha Almaty qalasy Alataý aýdanynyń polıtsııa basqarmasy QR Qylmystyq kodeksiniń 340-baby boıynsha qylmystyq is qozǵady.
Qalalyq ákimdikten atap ótkendeı, 2023 jyldyń maýsym aıynan bastap «Memlekettik qyzmetter» portaly arqyly (Elicense.kz) Almatynyń ekologııa jáne qorshaǵan orta basqarmasyna «Qazaq Stroy Almaty» JShS-nen turǵyn úı kesheni qurylysy aýmaǵyndaǵy aǵashtardy kesýge ruqsat alý úshin 6 ótinim kelip túsken. Alaıda, saraptama qorytyndysynyń bolmaýyna baılanysty aǵashtardy kesýge ruqsat berilmedi.
28 qarashada «Altyn Ai TK» JShS jańa menshik ıesi jumys jobasy «Memsaraptama» RMK hatymen tolyqtyryldy. Keıin 5 jeltoqsanda memlekettik qyzmetter portaly arqyly «Qazaq Stroy Almaty» JShS-nen qyzmet kórsetý obektileri men jerasty parkıngi bar MJK qurylysyna jasyl jelekterdi kesýge qatysty ruqsat alýǵa qujattar qaıtadan tapsyryldy.
«Aıta ketý kerek, aǵashtardy kesýge ruqsat berý memlekettik qyzmet sanalady, sondyqtan qajetti qujattar paketi usynylǵan jaǵdaıda ruqsat berýden bas tartý múmkin emes. Bekitilgen jáne kelisilgen qala qurylysy qujattamasynda (Memlekettik vedomstvodan tys saraptama) kózdelgen qurylys qyzmetin, qurylys-montaj jumystaryn júzege asyrý úshin jaǵdaılardy qamtamasyz etý jónindegi qujattardyń tolyq paketiniń usynylýyna baılanysty 2023 jylǵy 11 jeltoqsanda basqarma joǵaryda kórsetilgen mekenjaı boıynsha kesýge ruqsat berilgen 2 797 dana aǵashtyń ornyna 27 970 dana kóleminde ótemdik jasyl jelek otyrǵyzatyn bolady. Basqarma sonymen qatar 100 dana jasyl jelekterdi basqa jerge otyrǵyzý jónindegi jumystarǵa kelisim berdi», - dep habarlady ákimdikten.
Kóshetterdi otyrǵyzý «Almaty qalasynyń jasyl jelekterin kútip-ustaý jáne qorǵaý qaǵıdalarynyń» barlyq talabyn saqtaı otyryp, bıiktigi keminde 2,5 metr bolatyn jalpy paıdalanymdaǵy jerlerde júrgiziledi.