Almatyda «5:32» serıalynyń prodıýserine sot úkimi shyqty

<p>ALMATY. KAZINFORM &ndash; Almatyda adam ólimine ákep soqqan avtobýs apatyna kináli &laquo;5:32&raquo; serıalynyń prodıýseri - júrgizýshige qatysty sot úkimi shyqty</p>

Almaty qalasy Almaly aýdandyq sotynda QR Qylmystyq kodeksiniń 345-babynyń 3-bóligi (abaısyzda adam ólimine ákep soqtyrǵan jol qozǵalysy erejelerin buzýy) boıynsha 28 jastaǵy áıelge qatysty qylmystyq is qaraldy.

Sot Anel Sartaevavany 2 jyl 6 aıǵa bas bostandyǵynan aıyrdy. Ol jazasyn eń tómengi qaýipsizdik mekemesinde óteıtin bolady. Sondaı-aq 5 jyl merzimge kólik quralyn basqarý quqyǵynan aıyryldy.

Sonymen birge, sýdıa jazanyń oryndalý merzimin úsh jylǵa, sottalýshynyń balasy 3 jas 9 aıǵa tolǵanǵa deıin shegerdi.

Sot úkimi zańdy kúshine engen joq.

Buǵan deıin prokýror sottan A.Sartaevany kináli dep tanyp, ony 2,5 jylǵa bas bostandyǵynan aıyrýdy suraǵan edi.

Sondaı-aq, jol apatynan qaza bolǵan marqumnyń otbasy júrgizýshini keshirgeni týraly jazǵan edik. 

Eske salaıyq, 26 maýsym kúni qoǵamdyq kólik pen jeńil mashına soqtyǵysqan edi. Saldarynan 16 adam jaraqat alyp, bir adam qaza tapty. 

Keıin qoǵamdyq kólik kamerasy túsirgen beınejazba jelide tarady. 

Avtobýstyń apatqa ushyraýyna «5:32» serıalynyń prodıýseri sebepker bolǵan. 

Keıin kúdikti dep tanylǵan jeńil kólik júrgizýshisi Anel Sartaeva tergeý ýaqytynda úı qamaǵynda bolatyny týraly jazǵan edik.